स्याङ्जाको आँधीखोला गाउँपालिका -५ जुग्ले स्थित आँधीखोला इङ्लिस बोर्डिङ स्कुलले आफ्ना विद्यार्थीहरुलाई मौलिक संस्कृतिको संरक्षण गर्न अभ्यास गराएको छ ।

अभ्यास स्वरुप स्कुलमा अन्तरसदनात्मक ‘आँधीखोला सेरोफेरो’ भन्ने विषयमा लोक भजन प्रतियोगिता गरिएको प्रधानाध्यापक स्मृति काफ्लेले जानकारी दिइन् । लोप हुँदै गरेको मौलिक संस्कृतिको संरक्षण गर्दै नयाँ पुस्तालाई परम्परागत कला, संस्कृतिको बारेमा सिकाउन अभ्यास स्वरुप लोक भजन प्रतियोगिता गरिएको प्रधानाध्यापक काफ्लेको भनाइ थियो ।

‘हिजोका लोक संस्कृतिहरु भजन, किर्तन, मौलिक लोक गित, संगीत सुन्दा अबको पुस्ता अचम्मित नहोस्’ भन्दै कलिला बालबालिकालाई मौलिक संस्कृतितर्फ पनि प्रेरित गर्ने उद्देश्यका साथ प्रतियोगिता आयोजना गरिएको प्रधानाध्यापक काफ्लेले बताइन् ।

उनले अतिरिक्त क्रियाकलाप अन्तर्गत विद्यालयका चार सदनका विद्यार्थीहरुबीच प्रतिस्पर्धा गरिएको बताइन् । प्रतियोगितामा कर्णाली सदन, बाग्मती सदन, लुम्बिनी सदन र गण्डकी सदन क्रमशः प्रथम, द्वितीय, तृतीय र चौथो बनेको थियो ।