काठमाडौँ । कीर्तिपुर नगरपालिका–१० स्थित त्रिवि क्रिकेट मैदानमा नेपाल प्रिमियर लिग –एनपिएल)को उद्घाटन खेल हेर्न जाने क्रममा भीडमा च्यापिएर २ प्रहरी जवानसहित ७ जना घाइते भएका छन् ।

आज शनिबार दिउँसो विराटनगर किङ्स र जनकपुर बोल्ट्सबीच भएको उद्घाटन खेल हेर्न पुगेका दर्शकहरुबीच धकेलाधकेल पछि भएको झडपका क्रममा ७ जना घाइते भएका हुन् ।

सो झडपमा क्रममा संघीय संसद् सुरक्षा बेस, नयाँ बानेश्वरमा कार्यरत २६ वर्षीय प्रहरी जवान अजय तामाङ र २८ वर्षीय दान बहादुर राउत घाइते भएको बताइएको छ ।

प्रहरीका अनुसार कीर्तिपुर अस्पतालमा सामान्य उपचार पछि वीर अस्पताल रिफर गरिएका तामाङलाई अहिले बाँसबारीस्थित न्युरो अस्पताल लगिएको छ । बोल्न नसक्ने अवस्थामा रहेका उनको टाउकोमा चोट लागेको बताइएको छ ।

यस्तै, कीर्तिपुर अस्पतालमा सामान्य उपचारपछि महाराजगञ्जस्थित नेपाल प्रहरी अस्पतालमा रिफर गरिएका राउत भने बोल्न सक्ने अवस्थामा रहेको प्रहरीले बताएको छ ।

अन्य घाइतेहरुको वीर अस्पताल, टिचिङ अस्पताल लगायतमा उपचार भइरहेको प्रहरीले जनाएको छ ।