स्याङ्जाको फेदीखोला गाउँपालिका -१ मट्टीखानमा अवस्थित अयरपानी सामुदायिक होमस्टेको अवलोकन भ्रमणमा निस्किएको स्याङ्जाली पत्रकारहरुको टोलिले आँधीखोला फाउन्डेसनको परिकल्पना निर्माण गरेको छ ।

विभिन्न ठाउँ र तहबाट सामाजिक कार्यमा अग्रसर रहेकोमा अब एकै ठाउँबाट सामाजिक कार्यमा आफ्नो टिमको सक्रियता बढाउने उद्देश्यले फाउन्डेसनको परिकल्पना गरिएको पत्रकार रोशन लामिछानेले बताए ।

लामिछानेले केही नयाँ मोडेलमा कार्य गर्ने गरि फाउन्डेसनको परिकल्पना गरेको र समाज रुपान्तरणमा प्रस्तावित फाउन्डेसनको महत्त्वपूर्ण पहल रहने बताए । पत्रकारहरुको टोलिले आँधीखोला फाउन्डेसनको ड्राफ्ट तयार गरिसकेको र यसले छिट्टै निचोड पाउने लामिछानेले जानकारी दिए ।

पत्रकारहरुको टोलि सामुदायिक होमस्टेलाई प्रवर्द्धन र प्रचारप्रसार गर्नुपर्छ भन्ने उद्देश्य बोकेर अयरपानी सामुदायिक होमस्टे पुगेको थियो । स्याङ्जाली पत्रकारहरुको यो टोलि (घरबास पर्यटन) होमस्टे प्रवर्द्धन र व्यवसायीहरुलाई प्रोत्साहन गर्ने उद्देश्यका साथ बेला बेलामा पर्यटकीय गाउँहरुको अवलोकन गर्दै आएको छ ।

७ वर्ष पहिला स्थापना गरिएको भए पनि अयरपानी सामुदायिक होमस्टे सक्रिय ढंगबाट संचालनमा आएको भने ३ वर्ष मात्रै भएको अयरपानी सामुदायिक होमस्टे संचालन समितिका अध्यक्ष सपना गुरुङले बताइन् । अयरपानीमा १७ वटा घर भएपनी अहिले १० वटा घरहरुलाई होमस्टे अर्थात् घरबास पर्यटनको रुपमा संचालनमा ल्याइएको उनको भनाइ छ ।

त्यहीँका स्थानीय उत्पादन तथा स्थानीय परिकार र खानाहरुबाट अतिथी सत्कार गरिँदै आएको र अझै व्यवस्थित गरिँदै लैजाने सिरान घरे होमस्टे संचालक जसमाया गुरुङले बताइन् ।