आईसीसी यु-१९ विश्वकप खेल्ने स्याङ्जाका खेलाडीलाई अर्जुनचौपारी गाउँपालिकाले पुरस्कृत गर्ने भएको छ ।

खेलकुदमा स्याङ्जाको इतिहास रचेकोकोले विश्वकप खेल्ने तीनैजना महिला क्रिकेट खेलाडीलाई पुरस्कृत गरिने गाउँपलिका प्रमुख प्रकाश तिवारीले जानकारी दिए ।

खेल र खेलाडीको विकासको पक्षमा पालिका रहेको बताउँदै अध्यक्ष तिवारीले यहि मङसिर ६, ७ र ८ गते आयोजना गरिएको दोस्रो राष्ट्रपति रनिङ शिल्ड प्रतियोगिता तथा शैक्षिक महोत्सवको समापनमा स्याङ्जाका ज्योत्सनिका मरासिनी, सिमाना केसी र कुसुम गोदारलाई प्रोत्साहन स्वरुप जनही पन्ध्र हजार रुपियाँले पुरस्कृत गरिने बताए ।

युएईमा भएको विश्वकप एसिया छनोटमा नेपाली टोलीले घरेलु टोलीलाई पराजित गर्दै उपाधि जितेर आईसीसी महिला यु-१९ टी – २० विश्वकप क्रिकेट प्रतियोगितामा स्थान पक्का गरेको थियो ।

आईसीसी महिला यु-१९ विश्वकपका लागि छनोट भएको नेपाली यु-१९ टोली बिहिवार साँझ मात्र स्वदेश फर्किएका थिए । स्याङ्जा जिल्ला क्रिकेट सङ्घसहित यहाँका खेलप्रेमी युवाले उपाधि जितेका महिला क्रिकेटर खेलाडीलाई पोखरा विमानस्थलदेखि मोटरसाइकल र्‍यालीसहित स्याङ्‌जा ल्याएका थिए ।

राजमार्गमा पर्ने स्थानीयबासीसहित स्याङ्जा जिल्ला क्रिकेट संघ, जिल्ला खेलकुद विकास समितिले भव्य स्वागत, सम्मान र बधाईसहित यहि सन् २०२५ जनवरी १८ देखि २ फेब्रुअरिसम्म मलेसियामा हुने विश्वकप प्रतियोगिताको उपाधि विजेताको सुभकामना दिएका छन् ।

सिनियर महिला क्रिकेट टोलीले विश्वकपमा स्थान पक्का गर्न नसकेको अवस्थामा यु-१९ टोलीले विश्वकपमा स्थान पक्का गरेको र महिला क्रिकेटका लागि स्याङ्‌जाले इतिहास रचेको जिल्ला क्रिकेट सङ्घका अध्यक्ष दिवाकर थापाले बताए ।