स्याङ्जाको फेदीखोला गाउँपालिकाले पढाइ सकिएपछि जागिरको अवसर प्रदान गरेको छ ।

फेदीखोला -२ अन्तर्गतको सिद्धार्थ माध्यामिक विद्यालयबाट २०८० मा डिप्लोमा इन कम्प्युटर इन्जिनियरिङ उत्तीर्ण विद्यार्थीहरु मध्येबाट पेडअप इन्टर्नसीपमा छनौट गरी पढाइ सकिएपछी जागिरको अवसर प्रदान गरिएको गाउँपालिका प्रमुख घनश्याम सुवेदीले जानकारी दिए ।

एक कार्यक्रमका बीचमा पेडअप इन्टर्नसीपमा छनौट भई कार्यालयमा इन्टर्न गर्न आएका विद्यार्थीलाई उत्कृष्ट कार्यसम्पादनको अपेक्षासहित पालिका अध्यक्ष, उपाध्यक्ष, प्रमुख प्रशासकीय अधिकृतसहितले सुभकामना, बधाई दिँदै स्वागत गरेका हुन् ।

सोही कार्यक्रममा कार्यालयमा इन्टर्नसीप गर्न आएका मध्ये एक अमृता गुरुङले पालिकाले आफूहरुलाई यस्तो अवसर प्रदान गरेकोमा पालिकाप्रती आभारी रहेको बताइन् ।

उनले अहिलेको जेनेरेशन भनेको सूचना प्रविधिको रहेको र आफूहरु यहि क्षेत्रमा लागिपरेको बेलामा आवश्यकताअनुसार पालिकाले अवसर दिरहँदा आफूहरुले पाएको जिम्मेवारी आगामी दिनमा पूरा गर्ने बताइन् ।

कार्यक्रममा विद्यार्थीहरुको तर्फबाट पालिकाले आफूहरुलाई स्वागत गरेकोमा गुरुङले धन्यवाद दिँदै खुशी व्यक्त गरेकी थिइन् ।