सिद्धार्थ राजमार्ग अन्तर्गत स्याङ्जाको फेदीखोला गाउँपालिका -१ कुभिण्डेदेखी भीरकोट नगरपालिका -१ बयरघारी सम्म मर्मत गर्ने लक्ष्य अनुरुप यहाँका खाल्डाखुल्डी पुरिएको छ ।

आफ्नै जनशक्तिको प्रयोग गरेर सडक डिभिजन कार्यालय पोखराले सिद्धार्थ राजमार्ग अन्तर्गत यहाँको ३३ किमि सडकका खाल्डाखुल्डी पुर्दै मर्मत गरेको हो । कार्यालय प्रमुख नवराज बास्तोलाले सडकको ठाउँठाउँमा खाल्डा तथा भत्किएको भेटिएपछि आफ्नै कार्यालयका प्राविधिक तथा लेन्थ वर्करको प्रयोग गरेर खाल्डा पुरिएको बताए ।

सडक डिभिजनले खरिद गरेको रोड मेन्टिनेन्स भेइकल ( सडक मर्मत उपकरण ) प्रयोग गरेर यहाँको करिब पाँच सयभन्दा धेरै सडकमा खाल्डा र सडकको भत्केका दुई छेउ मर्मत गरिएको कार्यालय प्रमुख बास्तोलाले बताए । गण्डकी प्रदेशमै पहिलोपटक यो उपकरण प्रयोग गरिएको र दुई हजार वर्ग मिटर सडक मर्मत गरिएको कार्यालयले जनाएको छ ।

सडक डिभिजन कार्यालय पोखराले दस लाख बराबरको विटुमिन इमल्सन (अलकत्र) तथा तीन लाख बराबरको बेस र चिस्स खफिद गरेर काम गरेको जनाएको छ । पहिलोपटक यो उपकरण प्रयोगमा आएसङ्गै मेसिन चलाउने प्राविधिक लगायतका कालोपत्रे गर्ने जनशक्ति उत्पादन भएको कार्यालय प्रमुख बास्तोलाले बताए ।

यो प्रविधि सडक मर्मतसम्भारका लागि सस्तो र सहज भएको बताउँदै कार्यालय प्रमुख बास्तोलाले गण्डकी प्रदेश भित्रका सडक यस्ता खाल्डाखुल्डी ठाउँठाउँमा धेरै नै रहेको र यसरी नै पुरिने बताए ।