राष्ट्रिय स्वतन्त्र पार्टी (रास्वपा) का सभापति रवि लामिछानेलाई काठमाडौँमा पक्राउ गरेर पोखरा ल्याउने  क्रममा विभिन्न ठाउँमा कार्यकर्ताहरू उग्र रूपमा प्रस्तुत भएका छन् ।

स्थलमार्गबाट पोखरा ल्याउने क्रममा लामिछानेलाई ल्याइएको पृथ्वीराजमार्ग रुटका विभिन्न स्थानका सडकमा पार्टीका नेता कार्यकर्ता भेला भएर विरोध प्रदर्शन गरेका हुन् ।

प्रहरीका अनुसार धादिङको नौबिसे, गल्छी, गजुरीलगायतका स्थानमा उनको पक्षमा प्रदर्शन भएका हुन् । प्रहरी गाडीमाथि पनि ढुंगा प्रहार गरिएको छ ।

सो क्रममा सडक अवरुद्ध पार्ने प्रयास समेत भएको प्रहरीको भनाइ छ । उसो त उनलाई पक्राउ गर्ने क्रममा पार्टी कार्यालय बनस्थलीमै पनि विरोध र नाराबाजी भएको थियो ।

लामिछानेलाई पक्राउको विरोधमा शनिबार पोखरामा समेत प्रदर्शनको तयारी गरिएको एक नेता बताउँछन् । यसबारे छलफल गर्न बेलुकी नै पोखरामा रास्वपाको प्रदेशस्तरीय बैठक बसेको थियो ।