पोखरा । गत असोज ११ र १२ गते देशका विभिन्न भागमा आएको बाढीपहिरोमा परेर ३ जना विदेशी नागरिकको मृत्यु भएको पुष्टि भएको छ ।

राष्ट्रिय विपद जोखिम न्यूनीकरण तथा व्यवस्थापन प्राधिकरणका अनुसार बाढीपहिरोमा परेर सिन्धुपाल्चोकमा २ जना कोरियन नागरिकले ज्यान गुमाएका छन् ।

सिन्धुपाल्चोकको सुनकोसी गाउँपालिका–४ च्यानेस्थित सिन्धु बीच रिसोर्टमा पहिरोले पुरेर उनीहरूको ज्यान गएको हो ।

यस्तै, रामेछापको खाँडादेवी नगरपालिकामा पनि एकजना अमेरिकी नागरिकको पहिरोमा परेर ज्यान गएको छ ।

रामेछापकै खाँडादेवीमै एकजना भारतीय नागरिक घाइते घाइते भएका छन् । उता दोलखास्थित एक रिसोर्टमा पहिरोले पुरेर एकजना कोरियन नागरिक पनि घाइते छन् ।

यता ललितपुरमा बाढीमा परेर ३ जना भारतीय नागरिक घाइते भएका छन् । पूर्वी नेपालको पाँचथरमा एकजना भारतीय नागरिक बाढीमा परेर बेपत्ता भएको जनाइएको छ ।

नेपाल प्रहरीको पछिल्लो तथ्याङ्कअनुसार उक्त बाढी पहिरोमा परी ज्यान गुमाउनेको सङ्ख्या दुई सय ४६ जना पुगेको छ। १८ जनाको अवस्था अहिलेसम्म थाहा हुन सकेको छैन । त्यस्तै एक सय ७८ जना घाइते भएका छन् ।