हुम्ला । हुम्लाको ताँजकोट गाउँपालिका–४ को तीर्थसैनामा बोलेरो जीप दुर्घटना हुँदा २ जनाको मृत्यु भएको छ।

शनिबार दिउँसो हुम्लाबाट नेपालगञ्ज जादैँ गरेको लु १ ज २३४३ नम्बरको जीप दुर्घटना हुँदा नेपालगञ्ज उपमहानगरपालिका–२० निवासी ४९ वर्षीय विष्णु परियार र हुम्लाको चङ्खेली गाउँपालिका–६ का करिब ६ वर्षीय बालक अभिषेक बुढाको मृत्यु भएको जिल्ला प्रहरी कार्यालय हुम्लाले जनाएको छ ।

प्रहरीका अनुसार रोकिराखेको जीप आफैँ पछाडितर्फ गुडेर तीन सय मिटर तल खसेको हो ।

गियर बक्स बिग्रेर रोकेको अवस्थामा सडकबाट ब्याक भई जीप तीन सय मिटर तल खसेको जिल्ला प्रहरी कार्यालय हुम्लाले जनाएको छ ।

प्रहरीका अनुसार गियर बक्स बिग्रेर बनाउन थालेपछि जीपमा रहेका पाँच जना गाडीबाट झरेका थिए । परियार र बुढा भने गाडीमै थिए ।

गाडीमा रहेका दुई जनाको मृत्यु भएको हो । मृतक दुवै जना दशैँ मान्न मामाघर हिँडेका प्रहरीले जनाएको छ ।