हिमाली जिल्ला मनाङमा बेमौसमी हिमपात भएको छ । पुस–माघ–फागुनमा पर्ने हिमपात यो वर्ष मनाङमा असोजमै परेको हो ।

देशभर वर्षा भइरहँदा मनाङमा भने हिमपात भइरहेको स्थानीयले बताएका छन् । हिमपातका कारण मनाङको माथिल्लो भेगको जनजीवन प्रभावित बनेको छ ।

मनाङको नार्पाभूमि गाउँपालिकाको नार र फू गाउँमा भारी हिमपात भएको छ । यस्तै, मनाङ ङिस्याङ गाउँपालिकाको हुम्डेदेखि माथिल्लो क्षेत्रमा हिमपात भएको छ । तिलिचो र थोराङ्ला क्षेत्रमा भारी हिमपात भएको स्थानीयले बताएका छन् ।

नार्पाभूमि गाउँपालिकाका सूचना अधिकारी महेश पाख्रिनले अविरल वर्षासंगै हिमपात भएको बताए । शुक्रबार रातीदेखिको हिमपातले नार र फू सेताम्य बनेको र मेता र च्याखुमा समेत हिउँ परेको बताए । उनका अनुसार किसानले यतिबेला करु काटेर खेत र छतमा सुकाएकोमा सवै हिउँले थिचिएको बताए । उनका अनुसार आलुबालीलाई समेत क्षति पारेको छ ।

पर्यटन व्यावसायी समिति मनाङका अध्यक्ष विनोद गुरुङले मनाङ गाउँ माथि हिउँ हिउँ परेको र तिलिचो तथा थोराङ्ला क्षेत्रमा बढी परेको बताए । हिउँले पर्यटक आवागमनलाई खासै असर नरे पनि थन्क्याउने बेलाको करु र फापर बालीमा क्षति पुगेको बताए । उनले बेमौसमी हिमपातले किसानलाई समस्यामा पारेको बताए ।

अन्नपूर्ण संरक्षण क्षेत्र आयोजना (एक्याप), इलाका संरक्षण कार्यालय मनाङका प्रमुख ढकबहादुर भुजेलले पर्यटकीय सिजन सुरु भएको र यही बेला हिमपात भएको बताए । देशभर मौसममा खराबी भइरहेको बेला यसले मनाङमा पनि असर पारेको र हिमपात नै भएको बताए । उनले पर्यटकलाई सतर्क रहेर गन्तव्य तय गर्न आग्रह गरिएको बताए ।

प्रमुख जिल्ला अधिकारी मातृका आचार्यले नार्पाभूमिका ग्रामीण वस्ती साथै मनाङ ङिस्याङ गाउँपालिका केन्द्र हुम्डेदेखि माथिल्लो क्षेत्रमा हिमपात भएको बताए । चामेको डाँडाकाँडामा पनि हिमपात भएको उनले बताए ।

उनले पर्यटकलाई आवश्यक सूचना लिएरमात्रै गन्तव्य तय गर्न भनेको र एक्यापलाई सोही अनुसार भनेको बताए । उनले शुक्रबारमात्रै चक्रीय अन्नपूर्ण पदमार्गमा १ सय ८ जना विदेशी पर्यटक आएको बताए । उनले विपद्संगको प्रतिकार र पूर्वतयारीका लागि सुरक्षा निकायलाई तयारी अवस्थामा रहन निर्देशन दिएको बताए ।