१५७१ मिटर लामो झोलुंगे पुल २० करोड ९३ लाखको लागतमा निर्माण भएको हो । पुल बनेपछि सुस्ताबासी खुसी हुँदै यस सुस्तामा उत्पादन हुने उखु र केरा बजारको पहुँचमा सहजता हुने स्थानीयले बताएका छन् ।

सुस्तालाई भारतीय भूमिले तीनतर्फबाट र एकतर्फ नारायणी नदीले घेरेको छ ।

यहाँका बासिन्दा पुल नहुँदा आफ्नै पालिकाबाट प्रवाह हुने सेवा लिन र वाड कार्यालय जान पनि डुंगामा नारायणी नदी तरेर जानु पर्ने बाध्यता रहेको थियो ।

राष्ट्रपति पौडेलले अहिले सुस्तावासीलाई हिंडडुल गर्न केही सहजहोस् भनी सरकारले पुल निर्माण गरिदिएको र आर्थिक सवल भयो भने मोटरगाडी चल्ने पुलको केही वर्षपछि सुस्ताबासीले ‘उपहार’ स्वरुप पाउने आश्वासन दिएका थिए ।

नारायाणी नदीमा पुल नहुँदा सुस्ताबासी डुंगा तरेर कष्टपूर्ण यात्रा गरेर गाउँपालिका वा परासी आउने गरेको तर झोलुंगे पुल संचालनपछि आवातजावतमा धेरै सहज भएको सुस्ताबासीले बताएका छन ।

पुल संचालनमा आएपछि भारतीय पक्षबाट पटक–पटक अतिक्रमणको चपेटा परेको सुस्ताबासी समान्य कामको लागि पनि भारतको भर पर्न अवस्थाको अन्त्य भएको सुस्ता बचाउ अभियान कावा अध्यक्ष एवं वडा ५ का वडा सदस्य आम खानले बताए ।

उनले भने पुल नहँुँदा आफूहरु भारतीय बाटो एसएबसीको गाली खाएर पनि आवतजावत गर्न बाध्यता भएकोमा पुलले धेरै ठूलो राहत महसुस भएको बताए । पुल नहुँदा परासी गाउँपालिका र बर्दघाट काम जाँदा एक रात उतै बस्ने पर्ने अवस्था रहेको तर पुल संचालनपछि सदरमुकाम परासीमा जाँदा दिन नै बिताएर जानुपर्ने बाध्यताको अन्त्य भएको स्थानीय जयनारायण शाहले बताए ।

सुस्ताको प्रमुख नगदी बालीको रुपमा उखुखेती हो । यहाँका बासिन्दाले उखु बिक्री गर्न पनि भारतका चिनी मिलमा वा नारायणी नदी कटाएर नेपालका चिनी मिल तथा भेली मिलमा उँखु बेच्न बाध्य हुनु पर्दथ्यो । पुल बनेसँगै धेरै थोरै सामग्रीहरु पुलबाट सोझै वारपार गराउन सक्ने अवस्था सिर्जना भएकोले यहाँको बासिन्दाको जीविकोपार्जनमा पनि प्रभाव पार्ने शाहले बताए ।

यस्तै, पहिले पुल नहुँदा भारतका विद्यालयमा पढ्न जान बाध्य भएका विद्यार्थीहरु अब नेपालकै विद्यालयमा पढ्न सहज भएको छ । सुस्तामा कक्षा ५ सम्म मात्र पठनपाठन हुने एउटा आधारभूत विद्यालय रहेको छ । सुस्तामा पुल बनेपछि सुस्ताबासीको जीनवस्तरमा सहज हुने मात्र नभई सुस्ता गाउँलाई पर्यटकीयस्थलरुपमा विकास गर्न सकिने सुस्ताबासीले विश्वास लिएका छन् । रासस