गोरखा । गोरखामा जापनिज इन्सेफ्लाइटिस संक्रमणबाट एक महिलाको मृत्यु भएको छ ।

गोरखा नगरपालिका–१२ दशकिलोकी ३४ वर्षीया राधिका कुमालको मृत्यु भएको पुरानो मेडिकल कलेज चितवनले जनाएको छ ।

गत भदौ २५ गते जिल्ला अस्पताल गोरखामा उपचारपछि थप उपचारका लागि उनलाई चितवनको पुरानो मेडिकल कलेजमा लगिएको थियो ।

उपचारको क्रममा बिहिबार बिहान ८ बजे अस्पतालले मृतक घोषण गरेको हो ।

जापनिज इन्सेफ्लाइटिस क्युलेक्स प्रजातिको लामखुट्टेले सुङ्गुर र हाँसलाई टोकेर आफूमा यो रोग सार्छन् अनि संक्रमित लामखुट्टेले मानिसलाई टोकेपछि जापनिज इन्सेफ्लाइटिस रोग लाग्ने गर्छ । यो रोग मान्छेबाट मान्छेमा भने सर्दैन । जापनिज इन्सेफ्लाइटिस रोग लामखुट्टेले टोकेको ६ देखि १६ दिनसम्म रोगको लक्षण देखा पर्दछ।

यो रोग लागेपछि बेस्सरी टाउको दुख्ने, उच्च ज्वरो आउने, घाँटी कडा हुने, पक्षघात हुने जस्ता लक्षण देखिन्छ।