पोखरा । कास्कीको अन्नपूर्ण गाउँपालिका वडा नं ९ तिखेढुंगास्थित भुरुङ्दी खोलामा एक महिलाको शव फेला परेको छ ।

उक्त शव स्पेनिस नागरिक मोलास जुन्काको हुनसक्ने अनुमान गरिएको छ ।

प्रहरीका अनुसार शव बिग्रिएर पहिचान गर्न कठिन हुने अवस्थामा छ । पोष्टमर्टमका लागि पोखरा ल्याइएको छ ।

अन्नपूर्ण-९ का वडाध्यक्ष रमेश गुरूङका अनुसार सोमबार साँझ माछा मार्न गएकाहरुले शव देखेका थिए ।

उनीहरूले प्रहरीलाई खबर गरेपछि नेपाल प्रहरी र सशस्त्र प्रहरीको टोलीले मंगलबार उद्धार गरेर पोखरा ल्याएको छ ।

जुन्का गत भदौ १० गते हराएकी थिइन् । खोलाछेउ उनीहरूको झोला, लठ्ठी र कपडा भेटिएको थियो । उनीसँगै हराएका इरिक कासानोभासको शव यसअघि नै फेला परेको थियो ।

उनीहरू दुबै जनाले घोरेपानी पुनहिल पदयात्रा जाने भन्दै अन्नपूर्ण संरक्षण क्षेत्र आयोजना (एक्याप) को बिरेठाँटी चेकपोष्टमा भदौ ९ गते इन्ट्री गरेका थिए ।