पोखरा उद्योग वाणिज्य संघका ३५ औं महाधिवेशन शुक्रबार र शनिबार पोखरामा हुँदैछ । निर्वाचनको मिति नजिकिएसँगै नेतृत्वका आकांक्षीहरु यतिबेला मत माग्न ब्यस्त छन् । उनीहरुले घरदैलो अभियान सकाएका छन् ।

अध्यक्षका प्रत्यासी अर्जुन पोखरेल प्यानलबाट कार्यसमिति सदस्यका कान्छो उम्मेदवार हुन् सौगात थापा । यो प्यानलले विहीबार पोखरामा उम्मेदवार परिचय कार्यक्रम पनि राख्यो । सो क्रममा उम्मेदवार थापाले पर्यटन व्यवसायीको पहिचानले आफू चिनिन लागेको बताए ।

पर्यटकीय राजधानी पोखराको व्यवसायिक घराना थापा परिवारको कान्छो पुस्ता सौगातले अन्य क्षेत्रमा पनि लगानी रहेपनि आफूलाई पर्यटन व्यवसायीका रुपमा चिनाउन चाहेको उल्लेख गरे ।

उनले भने – म पर्यटन व्यवसायी भन्न रुचाउँछु । मैले पर्यटन व्यवसायीको समस्यालाई नजिकबाट बुझेको छु । हाम्रो टीमलाई जिताउनुभएमा समस्याको सम्बोधनका लागि हामी सँगै हुनेछौं ।’