स्याङ्‌जाको गल्याङ नगरपालिकामा आयोजित प्रथम गल्याङ प्रीमियर लिग (जिपिएल) क्रिकेट प्रतियोगिताको उपाधि गल्याङ ब्लास्टरलाई हात परेको छ । गल्याङ क्रिकेट संघले गत भदौ १ गतेबाट गल्याङ प्रीमियर टी-२० लिग क्रिकेट प्रतियोगिता संचालन गरेको थियो ।

शनिबार भएको फाइनलमा गल्याङ ब्लास्टरले गल्याङ ईगल्सलाई पराजित गरेर उपाधि आफ्नो हात पार्न सफल भएको हो । १४ ओभरमा ९२ रन बनाएर अलआउट भएको ईगल्सलाई दुई विकेट गुमाएर १० ओभरमा नै आफूले पाएको लक्ष्य पूरा गरेर गल्याङ ब्लास्टरले उपाधि जितेको हो ।

उक्त प्रतियोगिताको विजेता गल्याङ ब्लास्टरले एक लाख रुपियाँ र उपविजेता गल्याङ ईगल्सले ५० हजार रुपियाँ पुरस्कार पाएको थियो ।

त्यस्तै, प्रतियोगितामा सहभागी भएका आठ टिम प्रत्येकले जिल्ला बाहिरका ३/३ जना खेलाडी समावेश गरेर प्रतिस्पर्धा गरेका थिए । आयोजक गल्याङ क्रिकेट संघले जिल्लाभित्र क्रीकेट खेलप्रति रुचि राख्ने खेलाडीको पहिचान बढाउने र क्रिकेट खेललाई जिल्लामा व्यावसायिक गराउने उद्देश्यका साथ प्रतियोगिताको आयोजना गरिएको जनाएको छ ।