पोखरा महानगरपालिकाका निवर्तमान मेयर मानबहादुर जिसीलाई मातृशोक परेको छ ।

जिसीकी ९१ वर्षकी माता मानकुमारी जिसीकोआइतबार साँझ ६ बजेतिर आफ्नै निवास पोखरा वडा नं. २८, देउमाडीमा निधन भएको हो । माता जिसी केही समयदेखि अस्वस्थ रहेकाे बताइन्छ ।

स्व. मानकुमारीको सोमबार बिहान देउमाडीस्थित घरबाट शवयात्रासहित अन्त्येष्टि गरिने परिवारजनले जनाएको छ ।

मानकुमारीका पति नरबहादुर, जेठा छोरा मानबहादुर, माइला सूर्यबहादुर, साइला कृष्णबहादुर र कान्छा रामबहादुर जिसी छन् । एक छाेरी तीर्थकुमारी बराल छन् ।

यसैबीच, नेकपा एमाले पोखरा महानगर कमिटीले पोखराका निवर्तमान मेयर मानबहादुरकी माता एवं पार्टीका असल अभिभावक मानकुमारीको निधनप्रति दुःख व्यक्त गरेको छ ।

पार्टी अध्यक्ष जीवन आचार्यले मानकुमारीको निधनले एमालेका लागि अपूरणीय क्षति पुगेको उल्लेख गरे ।

यस्तै, नेपाली कांग्रेस कास्की क्षेत्र नं. १ का सचिव सरोज केसीले मानकुमारीको निधनप्रति दुःख व्यक्त गरेका छन् ।