पोखरा वडा नं. २१ मट्टिखान जाने सडकको एकहाते नजिक थुन्कु भन्ने ठाउँमा गत साउन १३ गते भएको स्कुल बस दुर्घटनामा ज्यान गुमाएका आरती विक र उनको छोरा प्रिन्सको आज अन्त्येष्टी गरिएको छ ।

मुक्ति समाज नेपालका केन्द्रीय सचिव धनबहादुर नेपालीका अनुसार मृतक परिवारलाई सडक दुर्घटना बीमाबाहेक थप संस्थागत ११ लाख क्षतिपुर्ति दिने सहमति भएपछि आज शव बुझेर अन्त्येष्टी गरिएको हो । दुई जनाको मृत्यु भएको हुनाले १० लाख दुर्घटना बीमा रकम हुन जान्छ ।

विहीबार नागरिक समाज, मुक्ति समाज, मृतकका आफन्त, विद्यालय व्यवस्थापन समिति, एनप्याव्सनका प्रतिनिधिसहितहरुबीच जिल्ला प्रहरी कार्यालयमा छलफल भएको थियो ।

आरती कार्यरत पोखरा १७ बिरौटास्थित एलपी मेमोरियल इङ्लिस बोर्डिङ स्कूल प्रशासन र एन व्याब्सनबाट ११ लाख रूपैयाँ दिने सहमति भएको बताइन्छ ।

गत सोमबार बिहान उक्त स्कूलको ग १ क ६२१९ नम्बरको बस दुर्घटनामा परेको थियो । दुर्घटनामा चालक, सहचालकसहित ३० जना घाइते भएका थिए । तीमध्ये आमा छोराको मृत्यु भएको थियो ।

घाइते २८ मध्ये अझै पनि ११ जनाको उपचार जारी रहेको छ । प्रहरीका अनुसार मणिपालमा चालकसहित ३ जना, गण्डकी मेडिकल कलेजमा ४ जना र पोखरा स्वास्थ्य विज्ञान प्रतिष्ठानमा ४ जना गरी कुल ११ जनाको अहिलेपनि उपचार भइरहेको छ ।

सम्बन्धित समाचारः

स्कुल बस दुर्घटना [अपडेट]: आमा छोराको मृत्यु, घाइते २८ जनाको नामावलीसहित

स्कुल बस दुर्घटना [अपडेट]: सहयोगी महिलाको मृत्यु, चालक मणिपाल रिफर

पोखरामा विद्यार्थी बोकेको स्कुल बस दुर्घटना