सरकारले तीनवटा प्रदेशका प्रदेश प्रमुख हेरफेर गरेको छ ।

सोमबार बसेको मन्त्रिपरिषद् बैठकले बागमती, लुम्बिनी र कर्णालीका प्रदेश प्रमुखलाई हटाएर नयाँ प्रदेश प्रमुख नियुक्त गर्ने निर्णय गरेकाे हाे ।

बैठकले बागमती प्रदेशका प्रमुख यादवचन्द्र शर्मा, लुम्बिनी प्रदेशका प्रमुख अमिक शेरचन र कर्णाली प्रदेश प्रमुख तिलक परियारलाई पदमुक्त गर्न सिफारिस गरेको छ।

नेकपा माओवादी केन्द्र र एकीकृत समाजवादी निकट रही नियुक्त भएका प्रदेश प्रमुखहरुलाई पदमुक्त गरी काँग्रेस र एमाले निकटलाई प्रदेश प्रमुख नियुक्त गर्न सिफारिस गरिएको छ ।

एक मन्त्रीका अनुसार बागमतीमा दीपक प्रसाद  देवकोटा, लुम्बिनीका श्रीकृष्णबहादुर घर्तीमगर र कर्णालीमा यज्ञराज जोशीलाई प्रदेश प्रमुखको रुपमा नियुक्त गरिएको छ ।

संविधानको धारा १६५ को उपधारा १ बमोजिम बागमती, लुम्बिनी र कर्णाली प्रदेशका प्रदेश प्रमुखहरूलाई पदमुक्त गर्न राष्ट्रपति समक्ष सिफारिस गर्ने निर्णय गरेको एक मन्त्रीले बताए।

कञ्चनपुरका जोशी कांग्रेसका केन्द्रीय सदस्य हुन् भने कैलालीका देवकोटा एमाले, रोल्पाका घर्ती कांग्रेस नेता हुन् ।