पोखरामा विद्यार्थी बोकेको स्कुल बस दुर्घटनामा परेको छ ।

पोखरा महानगरपालिका वडा नं. १७ बिरौटामा रहेको एलपी मेमोरियल इङ्लिस बोर्डिङ स्कूलको ग १ क ६२१९ नम्बरको बस दुर्घटनामा परेको हो ।

कास्की प्रहरीका अनुसार छोरेपाटन भन्दा ३ किमि टाढा पोखरा वडा नं. २१ मट्टिखान जाने सडकको एकहाते नजिक थुन्कु भन्ने ठाउँमा दुर्घटनामा परेको उक्त बसमा २८ जना विद्यार्थी, चालक र सहयोगी (महिला) गरी ३० जना सवार थिए ।

प्रारम्भिक जानकारी अनुसार सवार चालक, सहयोगी तथा विद्यार्थीहरू घाइते भएका छन् । उनीहरूको उद्धार गरी अस्पताल पठाइएको प्रहरीले जानकारी दिएको छ ।

घुम्तीबाट खसेको बस तल्लो सडकमा पुगेको छ । बस ५० मिटर तल सडकमा  खसेको छ ।

प्रत्यक्षदर्शीका अनुसार बस नपल्टिकनै सिधा रुपमा घस्रिएर धेरै तल पुगेको र बल्ड्याङ नखाएका हुनाले ठूलो क्षति हुनबाट जोगिन सफल भयो ।

बस मट्टिखानबाट विद्यार्थी लिएर स्कुलतर्फ फर्कंदै थियो । बस तीव्र गतिमा रहेको बुझिएको छ । घटनाबारे थप विवरण आउन बाँकी छ ।

बाँकी तस्वीरहरु सामाजिक सञ्जालबाट ।