स्याङ्जाको भिरकोट नगरपालिका -४ दर्बुङठाँटीमा जीप दुर्घटना हुँदा चारजना घाइते भएका छन् । सामान्य चोटपटक लागेकाको वालिङ्रमा सामान्य उपचार पश्चात् डिस्चार्ज गरिएको र  गम्भीर घाइते भएका दुईको पोखरामा उपचार भइरहेको प्रहरीले जनाएको छ ।

भित्री सडकखण्ड हुँदै वालिङ्तर्फ जाँदै गरेको ध १ ज २६ नम्बरको बोलेरो जीप अनियन्त्रित भई सडकबाट करिब १० मिटर तल पल्टिँदा दुर्घटना भएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

घाइते भिरकोट -४ का ५१ वर्षीय इन्द्रबहादुर थापा र २८ वर्षीय धन बहादुर रानाको प्राथमिक उपचार स्वास्थ्य केन्द्र, वालिङ्मा सामान्य उपचार पश्चात् डिस्चार्ज गरिएको र जीपमा सवार स्थानीय ७२ वर्षीय सोभा थापा र जीप चालक ३६ वर्षीय चित्र बहादुर रानाको पोखरा स्थित मणिपाल शिक्षण अस्पतालमा उपचार भइरहेको डिएसपी रानाले बताए ।