पोखरा । आन्दोलनमा रहेको यातायात व्यवसायीले आज पोखरामा सार्वजनिक सवारी साधन तथा कालो नम्बर प्लेटका भाडाका सवारी चलाएका छैनन् ।

गण्डकी सरकारलाई दिएको ४८ घण्टे अल्टिमेटमलाई बेवास्ता गरेको भन्दै आजदेखि सार्वजनिक सवारी साधन घर र ग्यारेजमा थन्काएको नेपाल यातायात व्यवसायी राष्ट्रिय महासंघ गण्डकी प्रदेश समितिका सचिव योगेन्द्र बहादुर केसीले जानकारी दिए ।

उनका अनुसार निजी सवारी साधन (रातो प्लेट) लाई यात्रु ओसारपसार गर्न दिनेगरी गण्डकी सरकारले कार्यविधि बनाउन लागेको भन्दै तत्काल खारेज गर्न ४८ घण्टे अल्टिमेटमसहित ज्ञापन पत्र बुझाइएको थियो ।

उक्त म्याद सकिएको भन्दै यातायात व्यवसायीहरु आजदेखि अनिश्चितकालीन आन्दोलनमा उत्रेका हुन् । वार्ताका लागि प्रयास भइरहेको भन्दै उनले सहमतिमा पुगे आन्दाेलन फिर्ता लिने नत्र कडा तरिकाले प्रस्तुत हुने चेतावनी दिएका छन् ।

सार्वजनिक सवारी साधन नचलेपछि यात्रुलाई सास्ती परेको छ । निजी राताे नम्बर प्लेटका सवारी भने निर्वाध चलिरहेका छन् ।