पोखरा । वडा प्रहरी कार्यालय, बैदामका प्रमुख प्रहरी नायव उपरीक्षक (डीएसपी) राजेन्द्रकुमार श्रेष्ठ विरुद्ध अख्तियार दुरुपयोग अनुसन्धान आयोगमा बेनामे उजुरी परेको छ ।

श्रेष्ठले पदीय मर्यादा विपरीत प्रहरीको जनशक्ति नै दुरुपयोग पर्यटन व्यवसायीसँग पैसा अशुल्दै आएको भन्दै उजुरी परेको हो । उक्त उजुरी गत असार ३० गते दर्ता  (सि-०८७२४१) भएको बताइन्छ ।

‘पोखराका पर्यटन व्यवसायीहरु’ नामबाट गरिएको उजुरीमा भनिएको छ , ‘व्यवसायीहरुले डिएसपी श्रेष्ठलाई प्रतिव्यक्ति मासिक ५० हजारदेखि १ लाख रुपैयाँसम्म बुझाउने गरेका छन् । त्यतिमात्रै होइन पैसा माग्ने उद्देश्यले डीएसपी श्रेष्ठले क्लब डान्सबार, दोहोरी गेट र भित्रसम्मै चेकिङको नाममा आतंक मच्चाउने र पैसा नदिने व्यवसायीमाथि कारवाहीको नाटक गर्दै आएका छन् ।’

डीएसपी श्रेष्ठले पर्यटन व्यवसायीसँग पैसाकै लागि बार्गेनिङ गरिरहेको पर्यटन व्यवसायीहरुले जनाएका छन् । व्यवसायीहरुले भ्रष्टाचार निवारण ऐन, २०५८ अनुसार कारवाही गर्न माग गरेका छन् ।