पोखरा । आर्थिक वर्षको सुरुवातीसँगै अन्नपूर्ण गाउँपालिकामा मुस्कानसहितको सेवा शुभारम्भ गरिएको छ ।

‘मुस्कानसहितको सेवा हामी सबैको प्रतिबद्धता’ नाराका साथ मंगलबार जनप्रतिनिधि तथा कर्मचारीले सेवा दिने प्रण गरेसँगै कार्यक्रम लागु गरिएको छ ।

जसअन्तर्गत कार्यालय प्रमुख, विभिन्न विषयगत शाखा प्रमुखदेखि वडा कार्यालयका ढोका ढोकामा सोही अनुसारको स्टिकर टाँसिएको छ ।

सेवा शुभारम्भ गर्दै गाउँपालिका अध्यक्ष विष्णुबहादुर केसीले कार्यक्रम लागु भएसँगै नागरिक, जनप्रतिनिधि तथा कर्मचारीमा सकारात्मक भावको विकास हुने बताए ।

‘सेवाग्राहीहरू रिसाएर पनि आउन सक्नुहुन्छ, उहाँहरूलाई खुसी बनाई सेवा दिएर पठाउने दायित्व कार्यालयको हो, कार्यक्रम लागु भएसँगै एक खालको सकारात्मक सन्देश जनतामा जान्छ नै,’ केसीले भने ।

प्रमुख प्रशासकीय अधिकृत विष्णुप्रसाद पोखरेलले कार्यक्रम लागु भएपछि कर्मचारीदेखि सेवाग्राहीको स्वास्थ्य, मनोविज्ञानमा पनि सकारात्मक प्रभाव गर्ने अपेक्षा सुनाए ।

गाउँपालिकाले उक्त सेवालाई यस वर्षको नीति तथा कार्यक्रममा पनि समेटेको छ ।