पोखरामा गत २६ असारमा पहिरोले घर पुरिँदा मृत्यु भएका युवकको परिवारलाई सरकारी कोषबाट राहत उपलब्ध गराइएको छ ।

नेपाल सरकारको विपद्का घटनामा परी मृत्यु भएका व्यक्तिलाई राहत उपलब्ध गराउने सम्बन्धी मापदण्ड, २०७७ बमोजिम जिल्ला विपद् व्यवस्थापन कोषबाट राहत दुई लाख हस्तान्तरण गरिएको हो ।

जिल्ला विपद् व्यवस्थापन समितिका अध्यक्ष एवम् कास्की जिल्लाका प्रमुख जिल्ला अधिकारी भरतमणि पाण्डे र जिल्ला सुरक्षा समिति कास्कीका पदाधिकारीहरु पुगेर भीमका बुवा मनबहादुर थापालाई उक्त रकम प्रदान गरिएको कास्की प्रशासनले जनाएको छ ।

पोखरा महानगरपालिका– २७ सहेलापाखा, कटहरको बोट स्थित मन बहादुर थापा क्षेत्रीको ब्लकले बनेको जस्ताले छाएको १ तले कच्ची घर पहिरोले पुरिँदा २२ वर्षीय छोरा भिम थापा क्षेत्रीको मृत्यु भएको थियो ।

ईलाका प्रहरी कार्यालय शिसुवा कास्कीबाट खटिएको प्रहरी टोलीले बिहान ७ बजे भिमलाई मृत अवस्थामा फेला पारी बाहिर निकालेको थियो ।
प्रहरीले भिमकी आमा ५० वर्षीया कमला थापालाई भने सकुशल उद्धार गरेको थियो । मनबहादुर भने कामको सिलसिलामा पोखरामा रहेका थिए ।