स्याङ्जाको पुतलीबजार नगरपालिका हुँदै बग्ने आँधिखोलाले बगाई ल्याएको अवस्थामा एउटा बेवारिसे स्कुटर भेटिएको छ भने स्कुटरमा सवार बेपत्ता रहेका छन् ।

भिरकोट नगरपालिका -४ छाङ्छाङ्दी बस्ने ४० वर्षीय बस चालक सुरेश श्रेष्ठले आइतबार प्रदेश नं.३-०२-००९ प ०१९३ नं. को स्कुटी लिई पुतलीबजार न.पा. ३ पुतलीखेत स्थित बहिनीको डेराकोठामा बस्ने छोरा/छोरी भेट्न भनि घरबाट निस्की हिँडेकोमा उनी सवार स्कुटर खोला किनारमा भेटिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

पुतलीवजार न.पा. १ मालेबगर स्थित आँधीखोलामा खोलाको बिच भागमा पानीमा बगाई ल्याई अड्किएको अबस्थामा भेटिएको स्कुटरलाई पानी बाहिर निकाली जि.प्र.का. स्याङजा लगिएको डिएसपी रानाले बताए ।

उनले स्कुटरमा सवार श्रेष्ठ हालसम्म सम्पर्कबिहिन रहेकोमा खोजतलास कार्य तथा थप अनुसन्धान भइरहेको बताए । उक्त स्कुटर कँहाबाट बगाएर ल्याएको भन्ने अहिलेसम्म खुल्न नआएको प्रहरीले जनाएको छ ।