निरन्तरको अविरल वर्षाका कारण गएको पहिरोमा परी स्याङ्जाको भिरकोटमा एकजना वृद्ध बेपत्ता भएकी छन् ।

बेपत्ता हुनेमा भिरकोट नगरपालिका -५ ज्यामिरेकी ७३ वर्षीया खेम कुमारी मल्ल रहेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

[सशस्त्र प्रहरी, नेपाल प्रहरी र स्थानियको ठुलो प्रयासमा पुरिएको अवस्थामा मल्लको शव आइतबार दिउँसो मात्र फेला परेको हो ।] – प्रहरीका अनुसार अद्यावधिक गरिएको ।

यस्तै, विगत केही दिनदेखि परेको अविरल वर्षाको कारण स्याङ्जा जिल्लाका विभिन्न स्थानहरूमा क्षति भएको छ । अहिलेसम्मको तथ्यांकअनुसार स्याङ्जा गल्याङ नगरपालिका वडा न. -०७ देबिस्थान बस्ने मिना थापाको ढुङ्गा माटो र काठले बनेको खरको छानो भएको १ तले गोठको तलबाट पहिरो जाँदा उक्त गोठ पहिरोले बगाएको, १ वटा भैंसी र १ वटा पाडो पुरिएर मृत्यु भएको, बिष्णु माया थापाको २ तले पक्की घर जोखिममा रहेको, मित्र कुमारी बरालको २ तले कच्ची घर जोखिममा रहेको र यम बहादुर हिटानको ३ तले कच्ची घर जोखिममा रहेको छ ।

यसैगरी, स्याङ्जा पुतलीबजार नगरपालिका वडा नं.-०१ वाणिज्य बैंक अगाडि रहेको ३० वर्षीय फारुक अलिको वर्कसपमा करिब ५० मिटर माथिबाट पहिरो आई मोटरसाईकल धुने २ वटा मेसिन पुरीएको, टिनको छानोमा क्षति भएको र धुन राखिएको स्थानीय अल्ताव हुसेनको बा. ०२-०५० प.४०१८ नं. स्कूटर पुरिएको प्रहरीले जनाएको छ ।

त्यस्तै, स्याङ्जा पुतलीबजार नगरपालिका वडा नं.-०३ कालीमाटी बस्ने ४५ वर्षीया आसा रोक्काको १ तले पक्की घरमा करिब २०/२५ मिटर माथिबाट पहिरो आई घर जोखिम अवस्थामा रहेको छ । आँधीखोला गाउँपालिका वडा नं.-०३ काउरे बस्ने ७१ वर्षीया मनमाया बि.क. को खरको छानो भएको कच्ची गोठमा माथिबाट पहिरो आई गोठ पूर्ण रुपमा क्षति हुनुको साथै २ वटा बाख्रा मरेका छन् ।

स्याङ्जा अर्जुनचौपारी गाउँपालिका वडा नं. ०३ बस्ने सरस्वती दमईको ढुङ्गा माटो ब्लकले बनेको टिनले छाएको एक तले घर वर्षातको कारण भत्कीन गई पूर्ण रुपमा क्षति भएको छ र अर्जुनचौपारी गाउँपालिका वडा नं.-० १ दारेगौँडा बस्ने ५० वर्षीय गुड्डु ब. दमईको एक तले कच्ची घर वर्षातको कारण आंशिक रुपमा क्षति भएको प्रहरी कार्यालयले जनाएको छ ।

प्रहरी कार्यालयका अनुसार वालिङ न.पा. १ बिर्सिखा टोल रामबाच्छा बस्ने टेक बहादुर बि.क.को १ तले पक्की घर अविरल वर्षाको कारण माथिबाट पहिरो आई घरको अगाडि साईडमा शौचालय क्षति हुनुका साथै घर नजिकै रहेको गोठ समेत भत्किई गोठ भित्र रहेको ३ वटा बाख्रामा २ वटा बाख्रा मरेको र १ वटा घाईते भएको छ । गल्याङ नगरपालिका वडा नं. -०६ पिडिखोला स्थित टांडी बस्ने देव बहादुर गुरुङले खेतमा जोत्न लिएर हिँडेको गोरु खोलाको किनारमा हिँडने क्रममा जमिन भासिन गई १ वटा गोरु खोलामा खसेर बेपत्ता भएको छ ।

त्यसैगरी, अर्जुनचौपारी १ बस्ने टोप ब. गुरुङले खेत जोत्न लैजाने क्रममा खाल्टे ठाडो खोलाले १ वटा गोरु बगाई बेपत्ता भएको छ । अविरल वर्षाका कारण स्याङ्जा जिल्लास्थित अवरुद्ध सिद्धार्थ राजमार्ग खुलाउने प्रयास जारी रहेको छ ।