पोखराको पूरानो एयरपोर्ट नजिकै नागढुंगा उकालोमा आज बिहान मोटरसाइकल दुर्घटना हुँदा एक विदेशी नागरिक घाइते भएका छन् ।

घाइते हुनेमा २६ वर्षीय रसियन नागरिक पिड्नेड भेनी रहेका छन् ।

मुस्ताङचोकबाट पृथ्वीचोकतर्फ गुडेको बा ९० प ५८३९ नम्बरको बेनेली मोटरसाइकल नागढुङ्गाको उकालोमा अनियन्त्रित भई दुर्घटना भएको जिल्ला ट्राफिक कार्यालय कास्कीले जनाएको छ ।

गम्भीर घाइते भएका उनलाई उपचारका लागि फेवासिटी अस्पतालमा लगेर उपचार भइरहेको छ । आइसियू कक्षमा उपचाररत उनको टाउकोमा रगत जमेको देखिएको छ । यद्यपी, अवस्था भने मध्यम रहेको प्रहरी बताउँछ ।

उनले हेलमेट नै नलगाई ओभरस्पीडमा बाइक कुदाएको प्रत्यक्षदर्शीसमेत रहेका पत्रकार लालप्रसाद शर्माले जानकारी दिएका छन् ।

प्रहरीको प्रारम्भिक अनुसन्धानको क्रममा हेलमेट नलगाएको बैदाम प्रहरीले देखेपछि तीव्र गतिमा भाग्ने क्रममा दुर्घटनामा परेको खुलेको छ । भेनीको मेडिकल रिपोर्ट आउँन बाँकी रहेको प्रहरीले जनाएको छ ।

मोटरसाइकल काठमाडौं बालुवाटारका सौगात साम बाँनियाको नाममा दता रहेकाले भाडामा प्रयोग गरिएको हुनसक्ने अनुमान गरिएको छ ।