स्याङ्जा अर्जुनचौपारी गाउँपालिकाका दिपक वि.क. गण्डकी प्रदेश युवा प्रतिभा पुरस्कारबाट सम्मानित भएका छन् ।

समाजसेवा/स्वयंसेवा विधामार्फत गण्डकी प्रदेशको सामाजिक क्षेत्रमा विशेष योगदान पुर्‍याएको भन्दै गण्डकी प्रदेश, सामाजिक विकास तथा स्वास्थ्य मन्त्रालयले अर्जुनचौपारीका वि.क.लाई ५० हजार पुरस्कार राशीसहित सम्मान गरेको हो ।

लामो समयदेखि विभिन्न क्षेत्रमा उल्लेखनीय योगदान पुर्‍याएका दिपक दलित उत्थान केन्द्र अर्जुनचौपारीका अध्यक्ष समेत हुन् । उनले केन्द्रको व्यवस्थापनमा गरिब तथा असहाय परिवारका घर र शौचालय निर्माण गर्ने तथा बिजुली बत्ती जडान गर्ने अभियानलाई तीव्रता दिदै गरिब तथा विपन्न वर्गका परिवारको सहारा बन्न सफल भएका छन् ।

सोही क्रममा गण्डकी प्रदेश अन्तर्गत विभिन्न क्षेत्रमा विशेष योगदान पुर्‍याएका युवा/युवतीलाई थप उर्जा प्रदान होस् भनी आयोजित `गण्डकी प्रदेश युवा प्रतिभा पुरस्कार´ बाट अर्जुनचौपारीका दिपकलाई प्रदेशका सामाजिक विकास तथा स्वास्थ्य मन्त्री विन्दुकुमार थापाले सम्मान गरेका थिए ।