स्याङ्जाको पुतलीबजार नगरपालिका -१ स्थित समता बचत तथा ऋण सहकारी संस्थाले सदस्यबीच अन्तरक्रिया र सहकारी सचेतना कार्यक्रम गरेको छ ।

कार्यक्रममा सहकारीको बचत तथा सहकारीमा लगानी र सदस्यले गर्नुपर्ने काम, कर्तव्य र अधिकारका बारेमा प्रशिक्षण दिइएको हो । राष्ट्रिय सहकारी बैंक लिमिटेडका सञ्चालक राम बहादुर जिसीद्वारा सो प्रशिक्षण सहकारीमा आवद्ध ४० जना सदस्यलाई दिइएको हो ।

उनले सहकारीको नीति, नियम बमोजिम संचालन भएमा कोहि कसैलाई पनि नोक्सान नपुर्‍याउने बताउँदै कमाइको केही अंश बचत गर्नुपर्नेमा जोड दिए । राष्ट्रिय सहकारी बैंक लिमिटेड पुतलीबजारका प्रमुख पुष्पा क्षेत्री, जिल्ला बचत तथा ऋण सहकारी संस्थाका अध्यक्ष रवीन्द्रमान श्रेष्ठ लगायतले उक्त कार्यक्रममा सहकारीका बारेमा आआफ्ना धारणा व्यक्त गरेका थिए ।

समता बचत तथा ऋण सहकारी संस्थाका अध्यक्ष अमृत नेपालीको अध्यक्षतामा सम्पन्न सो कार्यक्रम संस्थाका सचिव शालिग्राम कुँवरले संचालन गरेका थिए । ९४७ सदस्यसहित पुतलीबजारका ९ वटा वडाहरुलाई कार्यक्षेत्र बनाएको सहकारी संस्था वि. सं. २०७५ मा स्थापना भएको थियो ।