फेवातालमा डुबेर फेरि एक जनाको ज्यान गएको छ । मृत्यु हुनेमा बाग्लुङ घर भई हाल पोखरा-१८ खपौदी बस्ने ३३ वर्षीय शुकबहादुर मगर रहेका छन् ।

फेवातालमा डुबेर ५ दिन अघि मात्रै कास्की नौडाँडाँका २२ वर्षीय सञ्जय भण्डारीको ज्यान गएको थियो ।

जिल्ला प्रहरी कार्यालय कास्कीका अनुसार आज दिउँसो ४ः३० बजे खपौदीस्थित फेवातालमा माछा मार्ने क्रममा मगर डुबेका थिए ।

मगर डुबेर बेपत्ता भएको खबर प्राप्त हुने बित्तिकै कास्की प्रहरी र सशस्त्र प्रहरी बल नेपाल नं. २४ कालिका गण कास्कीको फेवातालमा तैनाथ एपिएफ रेस्क्यू वाच टावरको विशेष विपद् उद्धार एवं गोताखोरकाे टोली खटिएको थियो ।

टोलीले खोजी गर्नेक्रममा साँझ ५ः२१ बजे अचेत अवस्थामा उनको उद्धार गरेर उपचारका लागि पश्चिमाञ्चल क्षेत्रीय अस्पताल लगिएकोमा ६ः१३ बजे चिकित्सकले मृत घोषणा गरेको कालिका गण कास्कीका गणपति एसपी अरुणकुमार शर्माले जानकारी दिए ।

घटनाका सम्बन्धमा अनुसन्धान भइरहेको कास्की प्रहरीले जनाइएको छ ।