पोखरामा आज मध्यान्ह ट्रकको ठक्करबाट सडक छेउमा रहेका एक युवकको ज्यान गएको छ ।

मृत्यु हुनेमा पोखरा महानगरपालिका वडा नं. ३२, राजा चौतारा बस्ने २७ वर्षीय सागर तिवारी रहेका छन् ।

सागरलाई नयाँबजार, प्रदर्शनी केन्द्र नजिकै भित्री बाटोमा ग १ क ५३२० नम्बरको ट्रकले ठक्कर दिएको थियो । प्रत्यक्षदर्शीका अनुसार सागर सडक छेउमा सुतिरहेका थिए । उनी माइक्रो बसमा सहचालकको पनि काम गर्ने बुझिएको छ । घटनास्थल माइक्रो बसपार्कनेरै छ ।

दुर्घटनामा गम्भीर घाइते भएका उनलाई उपचारका लागि पश्चिमाञ्चल क्षेत्रीय अस्पतालमा लगिएकोमा चिकित्सकले १२ः५० बजे मृत घोषणा गरेको कास्की ट्राफिक प्रहरी प्रमुख इन्स्पेक्टर भानु शर्माले गण्डकन्यूजलाई जानकारी दिए ।

ट्रक र चालक रोल्पा, सुन्छरी गाउँपालिका वडा नं. २ बस्ने वर्ष २९ को तिलक बुढामगरलाई प्रहरीले नियन्त्रणमा लिएर अनुसन्धान गरिरहेको उनले जानकारी दिए ।