नेपालले एसियाली विश्वकप छनोट दोस्रो चरणको अन्तिम खेलमा हारको क्रम र गोल खडेरी दुवै तोड्दै बुधबार यमनलाई २–२ को बराबरीमा रोकेको छ ।

यो कप्तान तथा गोलरक्षक किरण लिम्बूको नेपालका लागि सयौं खेल रह्यो । उनी नेपालका लागि सर्वाधिक खेल खेल्ने खेलाडी हुन् ।

नेपालका लागि सञ्जीव विष्ट र जिलेप्सीजँग कार्कीले एक-एक गोल गरे । दुवैले नेपालका लागि गरेको यो पहिलो गोल हो ।

साउदी अरेबियाको दमामस्थिति प्रिन्स मोहम्मद बिन फयाद स्टेडियममा भएको खेलमा यमनले दोस्रो हाफको इन्ज्युरी समयमा गोल फर्काएपछि नेपाल जितबाट वञ्चित रह्यो ।

यसअघिका पाँच खेलमा नेपालले कुनै गोल गर्न सकेको थिएन । यस्तै लगातार पाँच खेलमा हारको क्रम पनि टुंगेको छ । नेपाल एक अंक बटुल्न पनि सफल रह्यो ।

नेपालको यसअघि नै विश्वकप छनोटको सम्भावना समाप्त भइसकेको छ । अब नेपालले एसियाकप छनोटको तेस्रो चरण खेल्नेछ ।