सिंह शार्दूल गुल्म आँधिखोला ब्यारेक स्याङ्जाद्वारा बिरुवा गाउँपालिकामा आयोजित नि: शुल्क स्वास्थ्य शिविरमा करिब ७०० जना नागरिकहरु लाभान्वित भएका छन् ।

स्याङ्जाको पुतलीबजार नगरपालिका -३ स्थित नेपाली सेनाको आँधिखोला ब्यारेकले स्वास्थ्य कार्यालय स्याङ्जा, स्याङ्जा अस्पताल, भिरकोट स्वास्थ्य चौकी र बिरुवा गाउँपालिकाको समन्वय, सहयोग र सहकार्यमा दुई दिने नि: शुल्क स्वास्थ्य शिविर सम्पन्न गरिएको ब्यारेकका सेनानी पुरुषोत्तम कार्कीले जानकारी दिए ।

सामाजिक उत्तरदायित्व अन्तर्गत ग्रामीण क्षेत्रमा रहेका नागरिकको स्वास्थ्य परिक्षणका लागि बिरुवा गाउँपालिका -८ मेथाभुरुङ स्थित भिरकोट स्वास्थ्य चौकीमा जेठ १६ र १७ गते ३ नं बाहिनी अड्डा र ३ नं फि.ए. गुल्म नेपाली सेनाको सहकार्यमा नि: शुल्क स्वास्थ्य शिविर सञ्चालन गरिएको सेनानी कार्कीले बताए ।

उक्त स्वास्थ्य शिविरमा नेपाली सेनाको सैनिक अस्पताल पोखरा र ३ नं फि.ए. गुल्मबाट साथै स्याङ्जाका स्वास्थ्य कार्यालयहरुबाट खटिएका विशेषज्ञ चिकित्सकहरुद्वारा परिक्षण एवं उपचार गरिएको थियो ।

दुई दिने नि: शुल्क स्वास्थ्य शिविरमा विशेषज्ञ चिकित्सकद्वारा हाडजोर्नी, ब्लड प्रेसर, मधुमेह, ग्यास्ट्राइटिस, स्त्रीरोग, बालरोग, चर्मरोग, नाक, कान, घाँटी, आँखा, पेट, छाती तथा मुटु रोग, छाला तथा यौन रोग, नशा रोग र दन्त चिकित्सक सेवाको साथै प्रकोपजन्य रोगका ६७८ जना नागरिकको परिक्षण तथा उपचार गरिएको सेनानी कार्कीले जानकारी दिए ।

सेनानी कार्कीका अनुसार स्वास्थ्य शिविरको पहिलो दिनमा १६३ जना महिला, ५६ जना पुरुष तथा २० जना बालबालिका र दोस्रो दिन १९४ जना महिला, ९५ जना पुरुष साथै १५० जना बालबालिका गरि जम्मा ६७८ जना नागरिक स्वास्थ्य सेवाबाट लाभान्वित भएका थिए । स्वास्थ्य शिविरमा धेरै नागरिकहरुलाई लाभान्वित गराउन सकिएकोमा शिविर अति नै प्रभावकारी रहेको सेनानी कार्कीले बताए ।

उक्त स्वास्थ्य शिविरमा पश्चिम पृतना हेडक्वाटरका पृतनापति उपरथी सन्तोष पौड्याल, प्रमुख जिल्ला अधिकारी सुनिता नेपाल, नेपाल प्रहरीका उपरीक्षक शालिग्राम शर्मा, राष्ट्रिय अनुसन्धान कार्यालय स्याङ्जाका उप- निर्देशक सुशान्त बराल, सशस्त्र प्रहरी बलका नायब उपरीक्षक देवराज जोशी, बिरुवा गाउँपालिकाका प्रमुख, उपप्रमुख, वडाध्यक्षहरु लगायत नागरिकहरुको उपस्थिति रहेको थियो ।