‘सहकारी ठगी प्रकरणमा गृहमन्त्री रवि लामिछानेमाथि छानबिन गर्नुपर्छ’- गगन थापा

कांग्रेस सांसद शाहीले मागे गृहमन्त्री लामिछानेको राजीनामा

गण्डक न्यूज सोमबार, ५ चैत्र २०८०

५ चैत्र २०८०

नेपाली कांग्रेसका सांसद गगनकुमार थापाले सहकारी ठगी प्रकरणमा नाम मुछिएका उपप्रधानमन्त्री तथा गृहमन्त्री रवि लामिछानेमाथि छानबिन गर्नुपर्ने बताएका छन् ।

सोमबार प्रतिनिधिसभा बैठकको आकस्मिक समयमा बोल्दै सांसद थापाले पोखराको सूर्यदर्शन सहकारीको सदस्य नै नभए पनि गृहमन्त्री लामिछानेले एक करोड रुपैयाँ गैरकानुनी रूपमा लिएको भन्दै यो प्रकरणमा छानबिन हुनुपर्ने बताएका हुन् ।

उनले लामिछानेले आफूले पैसा लिएको छैन र आफू सहकारीको सदस्य होइन भनेको भरमा उन्मुक्ति पाए अर्बौं रुपैयाँ ठग्ने अरु सय जनाले पनि उन्मुक्ति पाउने बताए ।

गृहमन्त्री लामिछाने र सूर्यदर्शन सहकारीलाई अनुन्धान नगर्ने हो भने अन्य धेरै सहकारीलाई पनि छोड्नुपर्ने हुने भएकाले सबैलाई छानबिन गर्नुपर्ने उनको माग छ । उनले गृहमन्त्री लामिछानेमाथि प्रहरीले अनुसन्धान गर्ने कुरामा आशंका पनि व्यक्त गरे । उनले यो प्रकरणका सम्बन्धमा प्रहरीको जवाफको माग गरे ।

सांसद थापाले नक्कली भुटानी शरणार्थी प्रकरण, सुन प्रकरणलगायतका देखा परेका सबै प्रकारका भ्रष्टाचारका घटनाको छानबिन गरी दोषीलाई कारबाही गर्न सरकारको ध्यानाकर्षण गराए ।

कांग्रेस सांसद शाहीले मागे गृहमन्त्री लामिछानेको राजीनामा

सोमबार प्रतिनिधिसभा बैठकको शून्य समयमा बोल्दै सांसद शाहीले सहकारी ठगी प्रकरणमा मुछिएका गृहमन्त्री लामिछानेले राजीनामा दिएर छानबिनमा सहयोग गर्नुपर्ने माग गरेका हुन् ।

‘गृहमन्त्रीज्यूले नियमविपरीत सहकारीबाट रकम लिएको भनेर प्रहरीमा उजुरी परेको छ । तर, सहकारी ठगीको अनुसन्धान गर्ने तालुक मन्त्रालय आफैँले सम्हालेको आरोप छ । पीडकलाई कारबाही गर्न गृहमन्त्रीज्यूले राजीनामा दिएर सहयोग गर्नुपर्छ,’ उनले भने ।

सांसद शाहीले कांग्रेसलाई पढाउँदा दोहोरो नागरिकता र पासपोर्टबारे नपढाउन गृहमन्त्री लामिछानेलाई आग्रह गरे । ‘दोहोरो नागरिकता र पासपोर्ट, सहकारी ठग्न, सुन तस्करसँग साँठगाँठ गर्न नसिकाउनुहोला । माओवादी सुन पार्टी बन्दै छरे । अर्थमन्त्री वर्षमान पुन सुन तस्करीसँग जोडिनुभाको छरे,’ उनले भने ।

सांसद शाहीले सुन तस्करी र सहकारी ठगी प्रकरणमा प्रधानमन्त्री पुष्पकमल दाहाल प्रचण्डले सदनलाई जवाफ दिनुपर्ने बताए ।