राष्ट्रिय प्रजातन्त्र पार्टी, नेपालका अध्यक्ष कमल थापाले नवनियुक्त गृहमन्त्री रवि लामिछानेलाई सहकारी ठगीको आरोप लागेको भन्दै सो आरोपलाई दूधको दूध, पानीको पानी गर्न चुनौती दिएका छन् ।

बिहीबार पार्टीले काठमाडौंमा आयोजना गरेको बृहत् जनप्रदर्शनपछि सम्बोधन गर्दै अध्यक्ष थापाले गृहमन्त्री रवि लामिछानेलाई आफूमाथि लागेको आरोपबारे स्पष्ट पार्न आग्रह गरे । उनले सहकारी ठगीको आरोपलाई पारदर्शी र जनतालाई चित्त दिन चुनौती दिए । उनले नयाँ गृहमन्त्रीले जनतालाई कसरी सुशासनको प्रत्याभूति दिनेछन् भनेर आफूहरूले हेरिराखेको बताए ।

उनले पूर्वउपराष्ट्रपति, पूर्वसभामुख र पूर्वमन्त्रीका छोराहरू सुन तस्करीलगायतका भ्रष्टाचारका काण्डमा संलग्न रहेको भन्दै उनीहरूलाई कारबाही गर्न सक्नुहुन्छ ? भनी प्रश्नसमेत गरे । उनले ललितानिवास जग्गा प्रकरणमा मुछिएका दुई पूर्वप्रधानमन्त्रीलाई कानुनको कठघरामा उभ्याउन सक्नुहुन्छ भनेर पनि प्रश्न गरे ।

उनले नेपालमा धर्म निरपेक्षता र संघीय गणतन्त्र असफल भएको उल्लेख गर्दै सरकार र पार्टीहरूको अकर्मण्यताका कारण युवाहरू विदेशिन बाध्य हुनुपरेको बताए ।