प्रधानमन्त्री पुष्पकमल दाहाल ‘प्रचण्ड’ ले आफूले नेपाली कांग्रेसलाई कहिले पनि धोका नदिएको बताएका छन् ।

विश्वासको मत लिनुभन्दा पहिला आज (बुधबार) प्रतिनिधि सभाको बैठकलाई सम्बोधन गर्दै उनले धोकाको आरोप बरु एमाले अध्यक्ष केपी शर्मा ओलीले लगाउन मिल्ने तर कांग्रेसले नमिल्ने बताए ।

‘बरु मलाई प्रधानमन्त्री बनाउन पहल गर्ने दलहरु र त्यसको मुख्य नेतृत्व माननीय केपी ओलीले लगाउन मिल्छ । प्रधानमन्त्री उहाँले बनाउने अनि खुरुक्क कांग्रेसमा जाने । उहाँले लगाउँदा त्यो मिल्दोजुल्दो हुन्छ । कांग्रेसले लगाएर मिल्दैन,’– उनले भने ।

साथै, कांग्रेसले आफूलाई भिलेन बनाउन खोजेको भन्दै उनले असन्तुष्टि ब्यक्त गरे । प्रधानमन्त्री प्रचण्डले माओवादीले कांग्रेस सभापति शेरबहादुर देउवालाई दुई पटक प्रधानमन्त्री बनाएको तथ्य नबिर्सन पनि आग्रह गरे ।

प्रधानमन्त्री दाहालले पछिल्लो एक वर्षमा कांग्रेस भित्रका विचार समूहहरूको द्वन्द्वले सरकार र गठबन्धनमा पारेको प्रभावबाट आफू आजित भएको बताए ।

उनले पछिल्लो एक वर्षमा काँग्रेसभित्रका विचार समूहहरूको द्वन्द्वले सरकार र गठबन्धनमा पारेको प्रभावले आफू आजित भएकाले गठबन्धन फेर्नु परेको बताए ।

उनले गठबन्धनमा गरेको परिवर्तन वा समीकरणमा गरिएको परिवर्तनसँगै कांग्रेसभित्रको आन्तरिक एकताको कारक बन्न पाएकोमा आफू सन्तुष्ट रहेको बताए ।  उनले नेपाली कांग्रेसभित्रको कचिङ्गल सफा भए पनि आफू खुसी हुने बताए ।

उनले नेपाली कांग्रेसको समर्थनमा आफू एक पटक मात्रै प्रधानमन्त्री भएको र कांग्रेस नेकपा (माओवादी केन्द्र) को समर्थनमा काँग्रेसबाट दुई पटक प्रधानमन्त्री बनेको बताए ।

उनले भने, ‘पछिल्लो एक वर्षमा काँग्रेस भित्रका विचार समूहहरूको द्वन्द्वले सरकार र गठबन्धनमा पारेको प्रभावले म आजित भएको थिएँ । तर आज मैले गठबन्धनमा गरेको परिवर्तन वा समीकरणमा गरिएको परिवर्तनसँगै काँग्रेसभित्रको आन्तरिक एकताको कारक बन्न पाएकोमा म खुसी छु । काँग्रेसभित्र पनि राम्रो एकता हुँदै छ । म नेपाली काँग्रेसका नेता साथीहरूलाई र सबैलाई विशेषरूपमा भन्न चाहन्छु की यो एकता प्रचण्डका कारणले भएको छ । यसलाई राम्रोसँग टिकाउनु होला । यसलाई शान्तिमा बदल्नुहोला । म खुसी नै छु । देशको लोकतन्त्रलाई बलियो बनाउन सुदृढ गर्न सहयोग पुग्छ । नेपाली काँग्रेसभित्रको कचिङ्गल सफा भयो भने म खुसी नै हुन्छु । म नेपाली काँग्रेसको समर्थनमा एकपटक प्रधानमन्त्री भएको छु तर माओवादी केन्द्रको समर्थनमा नेपाली काँग्रेसका सभापति दुईपटक प्रधानमन्त्री बनेको नबिर्सिनुहोला ।’

दाहालले वर्तमान सत्ता गठबन्धन कांग्रेसको विश्वासघातको जगमा खडा भएको बताए । उनले आफ्नो आलोचना गर्नेहरूप्रति लक्षित गर्दै उनले आफूले सत्ताच्युत हुँदै कहिल्यै शोक गीत गाउँदै नहिँडेको बताए । उनले आफूले विगतमा पनि देश संकटमा रहँदा प्रतिपक्ष नभइ सरकारकै सहयोगमा लागेको स्मरण गरे ।

उनले भने, ‘मैले अहिले प्राप्त गरेको प्रधानमन्त्री नेपाली काँग्रेसको विश्वासघातको जगमा खडा भएको छ । आज मलाई आलोचना गरिरहने साथीहरूलाई सोध्न चाहन्छु, मैले कहिले शोक गीत त गाउँदै हिँडिन । मैले कहिल्यै त्यस्तो आरोप लगाइन । म अहिले यो पनि सम्झिरहेको छु, त्यो बेला सुशील कोइराला प्रधानमन्त्री हुनुहुन्थ्यो, म प्रतिपक्ष दलको नेता थिएँ । देशमा भूकम्प गयो, ठूलो जनधनको क्षति भयो, म प्रतिपक्ष छैन, अब म नेपाली जनताको पक्षमा छु भनेको थिएँ । मैले बरु राष्ट्रिय सहमतिको आधार तयार पार्न समेत काम गरेको थिएँ ।’