संघमा सत्ता समीकरण परिवर्तनसँगै त्यसको असर प्रदेशमा देखिन थालेको छ । गण्डकी प्रदेश सरकारबाट नेकपा माओवादी केन्द्रका दुई जना मन्त्री बर्खास्त गरिएको छ ।

मुख्यमन्त्री सुरेन्द्रराज पाण्डेले नेकपा माओवादी केन्द्रबाट नियुक्त सामाजिक विकास मन्त्री सुशील सिम्खडा र भौतिक पूर्वाधार तथा यातायात मन्त्री रेशमबहादुर जुग्जालीलाई बर्खास्त गरेका छन् । दुई मन्त्रीलाई बर्खास्त गरेर उनले दुवै मन्त्रालय आफै मातहत राखेका छन् ।

यससँगै अब नयाँ सरकारका लागि कोर्स सुरु भएको छ । तर, गण्डकी प्रदेशमा नयाँ गठबन्धनलाई सरकार गठन गर्न सहज छैन ।

६० सदस्यीय प्रदेशसभामा नेकपा एमालेको २२ र माओवादी केन्द्रको ८ सांसद (सभामुखसहित) छन् । बहुमतका लागि ३१ सांसदको समर्थन आवश्यक हुन्छ तर सभामुख माओवादी केन्द्रकै रहेका कारण माओवादी र एमालेका गरी २९ सांसद हुन्छन् ।

प्रदेशसभामा दुई सिट रहेको राप्रपा नै निर्णायक छ । राप्रपा नयाँ गठबन्धनमा नरहेकाले पनि नयाँ सरकार गठन कठिन छ ।