पोखरा वडा नं. १३ कार्यालयले लायन्स र लियो क्लब अफ पोखरा सेन्टेनियलको सहकार्यमा शुक्रबार एक दिने जब फेयर कार्यक्रम आयोजना गयो । फेयरको करिब २ हजारले अवलोकन भ्रमण गरेको वडाध्यक्ष किरण बरालले जानकारी दिए ।

स्थानीय युवालाई रोजगारी उपलब्ध गराउने उद्देश्यले आयोजना गरिएको फेयरलाई माछापुच्छ्रे  बैंकका अध्यक्ष रोशन केसीले उद्घाटन गरे ।
उनले जब फेयर कार्यक्रम राखेर वडाले सराहनीय काम गरेको बताए ।

‘जब फेयरको आयोजना गरेर वडाले सराहनीय काम गरेको छ । यस कार्यक्रम मार्फत स्थानीय नागरिकलाई रोजगारी मिल्न सहज हुनेछ ।’– उनले भने ।

पछिल्लो समय युवाहरु १२ पढ्ने बित्तिकै विदेश जाने गरेको र देशमा आवश्यक दक्ष जनशक्ति हराउँदै गएको अवस्थामा जब फेयर जस्ता कार्यक्रम मार्फत् देशमा नै केही गर्न सकिनु सन्देश प्रवाह गर्ने उनको धारणा छ ।

वडाध्यक्ष किरण बरालले वडामा रहेका कोहिपनि युवाहरु बेरोजगार नहुन् भन्दै जब फेयरको अवधारणालाई अगाडि सारेको बताए । जब फेयरमा विभिन्न १२ वटा स्टल राखिएको थियो । जसमा विद्यार्थीदेखि स्थानीयले अवलोकन गरेका थिए ।

जब फेयरमा इन्फोम्याटिक्स कलेजका विद्यार्थीले आफूले तयार पारेको सामाग्री प्रदर्शन गरेका थिए । यस्तै, वडामा नै उत्पादन गरिएको उत्पादित वस्तुहरुलाई प्रदर्शन गरिएको थियो । जब सेन्टरबाट आवश्यकता अनुसारको जबका लागि परामर्श दिइएको थियो ।

वडाध्यक्ष बरालले आगामी दिनमा पनि यस्ता कार्यक्रमले निरन्तरता पाउने बताए । वडाको भौतिक विकास सँगै सामाजिक, आर्थिक, नैतिक र शैक्षिक विकासमा समेत ध्यान दिइएको उनले उल्लेख गरे ।

वडा सदस्य सरिफ अलिमियाँले स्वागत गरेको कार्यक्रमलाई वडाका सचिव अञ्जु गुरुङले संचालन गरेकी थिइन् ।