पोखरा महानगरपालिका वडा नं. १२ ले रक्तदान कार्यक्रम सम्पन्न गरेको छ ।  ‘रक्तदान जीवनदान, जीवनदान महादान’ भन्ने महान उद्देश्यका साथ शुक्रबार रक्तदान कार्यक्रम गरिएको हो ।

कार्यालय परिसरमा गरिएको कार्यक्रममा ५३ युनिट रगत संकलन भएको छ । वडा कार्यालय र लायन्स क्लब अफ पोखरा आदर्श चौतारीको आयोजना तथा रक्त संचार केन्द्रको प्राविधिक सहयोगमा रक्तदान कार्यक्रम राखिएको लायन्स क्लब अफ पोखरा आदर्श चौतारीका अध्यक्ष दामोदर आचार्यले बताए ।

कार्यक्रममा विभिन्न ठाउँबाट आएका मानिसहरूले रक्तदान गरेका थिए । रगतकै अभावले कोही पनि नागरिकले ज्यान गुमाउनु पर्ने अवस्था नआओस् भन्ने उद्धेश्यले रक्तदान कार्यक्रम गरिएको वडाध्यक्ष सन्तोष बास्तोलाले बताए ।

‘रगतको अभाव नहोस् र रक्तदान जीवनदान हो भन्ने भावनाको बिकास होस् भन्ने उदेश्यका साथ कार्यक्रम गरिएको हो’ उनले भने । पछिल्लो समय वडा कार्यालयले विकास निर्माणका कामसँगै सामाजिक कार्यक्रमहरु पनि गर्दै आइरहेको छ ।