ज्येष्ठ नागरिक सेवा केन्द्र पोखरा १५ ले ज्येष्ठ नागरिकहरुलाई धार्मिक भ्रमणमा लगेको छ ।

सेवा केन्द्र अन्तर्गत वडाका ३ केन्द्रमा जोडिएका वडाका ज्येष्ठ नागरिकहरुलाई मौला कालिका दर्शनका साथै देवघाट भ्रमणमा लगेको वडा अध्यक्ष तोरण बानियाँले जानकारी दिए ।

वडा सदस्य बलराम पौडेल र सेवा केन्द्रका अध्यक्ष रामबहादुर बस्नेतको नेतृत्वमा तीन वटा बस रिजर्भ गरी १२० जना पोखराबाट नवलपुर र चितवन गएका हुन् । कार्यपालिका सदस्य मन्दिरा परियार लगायतले बिदाइ गरे ।

अहिलेको व्यस्त समयमा घर परिवारले ज्येष्ठ नागरिकलाई समय दिन नभ्याउने तथा दिनभर घरमा बसिरहेका बुवा आमाहरूलाई नयाँ ठाउँको अवलोकन गराउने उद्देश्यले वडाको वार्षिक बजेटबाट भ्रमणमा लगिएको वडा अध्यक्ष बानियाँले बताए ।

बानियाँले नयाँ ठाउँको विकास तथा पछिल्ला दिनमा भएका परिवर्तनबारे प्रायः वृद्ध वृद्धा बेखबर रहने र कतिपय पोखराबाट बाहिर ननिस्किएकाहरू पनि भएकाले उहाँहरूको सम्मान स्वरूप एक दिने भ्रमणमा लगिएको जानकारी दिए ।

उनले औपचारिक विद्यालयको शिक्षासँगै आफूले जीवनमा भोगेका भोगाई र शिक्षा ज्येष्ठ नागरिकबाट पनि सिक्नुपर्ने भन्दै ज्येष्ठ नागरिकलाई सधैँ सम्मान गर्नुपर्ने बताए ।

भ्रमणमा सहभागीहरूले पछिल्लो समय वृद्ध वृद्धाहरूलाई उचित सम्मान नगरिरहेको अवस्थामा  यसरी वडाले वर्षेनी भ्रमणमा लगेकोमा खुसी व्यक्त गरे।  यस्ता कार्यक्रमले समाजमा सकारात्मक सन्देश दिने भन्दै यस्ता कार्यलाई निरन्तरता दिन पनि आग्रह गरे ।

भ्रमणमा सहभागीहरूले भजन, खैचडी बजाएर रमाइलो गरेका थिए । ज्येष्ठ नागरिक अन्तर जिल्ला भ्रमण कार्यक्रम अन्तर्गत वडाले गत वर्ष वडावासी एक सय वृद्ध वृद्धाहरूलाई धौलागिरी क्षेत्रमा भ्रमणमा लगेको थियो ।

जनप्रतिनिधि र कर्मचारीहरुको अध्ययन अवलोकन भ्रमण सम्पन्न

वडाले यसअघि जनप्रतिनिधि र कर्मचारीहरुको अध्ययन अवलोकन भ्रमण सम्पन्न गरिसकेको छ ।

फागुन ४ देखि ७ गतेसम्म पोखरादेखि सुनवल, त्रिवेणि धाम, वाल्मीकि आश्रम, अमलटारी होमस्टे, सिजी, मौला कालिका, सौराहा हुँदै पुन: पोखरासम्मको अध्ययन अवलोकन भ्रमण यात्रा सम्पन्न गरेको वडा सदस्य आशिष भण्डारीले जानकारी दिए ।