पोखरा । वीरगञ्जको नारायणी अस्पतालमा नवजात शिशु छाडेर आमा र आफन्त सम्पर्कविहीन भएका छन् ।

शनिबार अस्पतालमा भर्ना भएकी महिलाले छोरी जन्माएपछि सोही दिन बेलुकी नवजात शिशुलाई बेडमै छाडेर सुत्केरी र उनका परिवार फरार भएका हुन्।

अस्पताल प्रशासनका अनुसार नवजात शिशुलाई एनआईसियू वार्डमा राखिएको छ ।

वीरगञ्ज महानगरपालिका वडा नम्बर ६ रानीघाट ठेगाना टिपाएकी ३० वर्षीया सीतादेवी साह कानुलाई उनकी सासुले प्रसूति गराउन ल्याएकी अस्पतालले जनाएको छ । अस्पतालको रेकर्डमा महिलाको पतिको नाम धीरज साह कानु उल्लेख छ ।

नवजात शिशुलाई बेडमै छाडेर आमासहित परिवार सम्पर्कविहीन भएपछि अस्पताल प्रशासनले प्रहरीलाई खबर गरेको थियो । प्रहरीका अनुसार छोरी छाडेर फरार भएकी महिलाको यसअघि नै तीनजना छोरी रहेको खुलेको छ।

प्रसूति गराउन अस्पताल जाँदा महिलाको परिवारले अस्पतालको रजिस्टरमा नाम र ठेगाना नै गलत टिपाएको पनि प्रहरीले जनाएको छ ।