कास्की प्रहरीले तास खेलिरहेका ८ जना जुवाडेलाई रंगेहात पक्राउ गरेको छ ।

पोखरा महानगरपालिका वडा नं. २९ भण्डारढिकबाट बुधबार साँझ विशेष सूचनाका आधारमा इलाका प्रहरी कार्यालय डाँडाकोनाकबाट खटिएको टोलीले उनीहरुलाई पक्राउ गरेको कास्की प्रहरीका प्रवक्ता डीएसपी श्रवणकुमार बिकले जानकारी दिए ।

उनीहरुको साथबाट तास र ५७ हजार १ सय ९५ रुपैयाँ बरामद भएको छ । पक्राउ पर्नेमा पोखरा २७ तालचोकका बर्ष ५६ का दल्बहादुर गुरुङ, ४० वर्षीय कुमबहादुर गुरुङ, सैनिकबस्तीकी ३३ वर्षीया शान्ता मल्ल ठकुरी, पोखरा ३१ मोहरियाका ३७ वर्षीय जीवन शाही छन् ।

यसैगर पोखरा २९ सैनिकबस्तीकी ३६ वर्षीया सीतादेवी गुरुङ, ५७ वर्षीय तुलबहादुर पुन, ५६ वर्षीय भूपाल गुरुङ र ४८ वर्षका दुर्गा गुरुङलाई पनि रंगेहात पक्राउ गरिएको प्रहरीले जनाएको छ ।

उनीहरुविरुद्ध जिल्ला अदालतबाट सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुरसम्बन्धी मुद्दामा १० दिनको म्याद लिएर अनुसन्धान प्रकृया अघि बढाइएको डीएसपी बिकले बताए ।