नेकपा (एकीकृत समाजवादी) गण्डकीको अध्यक्षको जिम्मेवारी कास्कीका श्रीनाथ बरालले पाएका छन् ।

एकीकृत समाजवादीको शुक्रबार बसेको सचिवालयको बैठकले पोलिट्व्युरो सदस्य एवं कार्यवहाक अध्यक्ष रहेका बराललाई अध्यक्षको जिम्मेवारी दिएको हो ।

२०३६ सालदेखि राजनीतिमा अनवरत क्रियाशील बराल पोखरा १३, आर्वा निवासी हुन् । विगतमा जेलनेल पनि भोगेका उनी गत वर्षको प्रतिनिधि सभा सदस्य चुनावमा कास्की क्षेत्र नम्बर २ मा गठबन्धनतर्फका उम्मेदवार थिए ।

अध्यक्ष रामजी शर्मालाई प्रदेश सहइन्चार्जको जिम्मेवारी दिइएको एकीकृत समाजवादी प्रचार विभाग प्रमुख जगन्नाथ खतिवडाले जानकारी दिए ।

उनका अनुसार लुम्बिनी प्रदेश कमिटीका अध्यक्ष सोम पाण्डेलाई रुपन्देहीको इन्चार्ज तोकिएको छ । लुम्बिनी प्रदेश कमिटीका सचिव राजु गुरुङको राजीनामा स्वीकृत गरी अशोक कोइरालालाई चयन गर्ने निर्णय भएको छ ।

माघ १४ र १५ गते बस्ने केन्द्रीय परिषद् बैठकले खाली रहेको केन्द्रीय परिषद् सदस्यको ठाउँमा संस्थागत निर्णय र सिफारिसका आधारमा नेताहरुलाई मनोनयन गर्ने खतिवडाले बताए ।