पोखरा रंगशालाको क्रिकेट मैदानमा संचालित प्रतिभा क्रिकेट टुर्नामेन्ट सम्पन्न भएको छ ।

शनिबार भएको फाइनल खेलमा कक्षा १२ को व्यवस्थापन संकायको बिहानी सत्रको सेक्सन बी १३ रनले विजयी हुँदै उपाधि जितेको हो । दिवासत्रको व्यस्थापन समूहको १२ कक्षा उपविजेता बन्यो । आशिष विक म्यान अफ दी म्याच बने ।

प्रतियोगितामा बेस्ट बलर पनि आशिष नै बने । ९१ रन लिएका राहुल शर्मा बेस्ट ब्याट्सम्यान बने । रोहन चन्द बेस्ट फिल्डर बनेका छन् । प्रतियोगितामा १० कक्षासम्मको अन्तर सदन र प्लस टु तहमा विभिन्न समूहबीच प्रतिश्पर्धा भएको थियो । १० ओभरमा खेलाईएको प्रतियोगितामा विजयी टिमलाई विद्यालय संचालक समितिका अध्यक्ष नारायणप्रसाद पौडेल, प्राचार्य किरण सापकोटा लगायतले शिल्ड र मेडल प्रदान गरेका थिए ।

प्राचार्य सापकोटाका अनुसार अन्तरसदनमा छात्रका विभिन्न चार समूह थिए । त्यस्तै, प्लस टु तर्फ छात्रकै नौवटा टिमबीच प्रतिश्पर्धा भएको थियो । प्लस टु मा विहानी र दिवासत्रका ११ र १२ कक्षाका विद्यार्थीको समूह बनाएर प्रतियोगितामा खेलाइएको थियो ।

संचालक समितिका अध्यक्ष पौडेलले क्रिकेटका प्रतिभावान खेलाडी पहिचान गर्न यस्ता प्रतिश्पर्धा आवश्यक रहेको बताए ।

युवापुस्तामाझ क्रिकेट खेलको लोकप्रियता बढेकोले विद्यालयले टुर्नामेन्ट आयोजना गरेको प्राचार्य सापकोटाले बताए । विद्यालय तहमा भएको यो प्रतियोगिताले क्रिकेटका सम्भावित खेलाडी पहिचान गर्न सहज हुने उनको विश्वास छ ।