गण्डकी प्रदेशलाई सोझो सेटमा पराजित गर्दै विभागीय त्रिभुवन आर्मी क्लब एक खेल बाँकी छँदै ३४औं राष्ट्रिय भलिबल प्रतियोगिताको सेमिफाइनलमा प्रवेश गरेको छ ।

लगातार तीन जित निकाल्दै आर्मी समूह ‘बी’ मा एक खेल बाँकी छँदै अन्तिम चारमा स्थान पक्का गर्न सफल भएको हो । अब आर्मीले मंगलबार मधेश प्रदेशलाई पराजित गरेमा समूह विजेता बन्नेछ । गण्डकीले पनि कर्णाली प्रदेशलाई पराजित गरेमा समूह उपविजेता बनेर सेमिफाइनलमा पुग्नेछ ।

कर्णाली प्रदेशको सुर्खेतस्थित विरेन्द्रनगरमा रहेको खुल्लामञ्चको कोर्टमा सोमबार भएको खेलमा आर्मीले गण्डकीलाई ३–० को सोझो सेटमा पराजित गरेको हो । प्रतिस्पर्धात्मक बनेको पहिलो सेटमा आर्मी ३१–२९ ले विजयी हुन सफल भयो ।

आर्मीले सुरुवातमा सेट प्वाइन्ट नजिक पुगेपनि गण्डकीले सानदार प्रदर्शन गर्दै तीनपल्ट सेट प्वइन्टनजिक पुगेको थियो । त्यसपछि आर्मीले सुधारिएको प्रदर्शन गर्दै सेट आफ्नो पक्षमा पार्न सफल भयो ।

दोस्रो सेटमा स्पाइकर किरण गुरौं घाइते भएपछि गण्डकीको प्रदर्शन सोही अनुरुप हुन नसक्दा पराजित हुन पुग्यो । दोस्रो सेटमा २५–२१ को जित दर्ता गरेको आर्मीले तेस्रो सेट २५–२१ ले आफ्नो पक्षमा पार्दै जित निकाल्न सफल भयो ।

यस जितले अपराजित रहेको आर्मीको तीन खेलबाट ९ अंक पुगेको छ । पहिलो हार बेहोरेको गण्डकीको ३ खेलबाट ६ अंक छ ।

सुर्खेतमा जारी ३४औं राष्ट्रिय पुरुष भलिबल प्रतियोगितामा विभागीय टोली नेपाल पुलिस क्लबलाई पराजित गर्दै साविक विजेता नेपाल एपीएफ क्लव सेमिफाइनलमा प्रवेश गरेको छ ।

सोमबार भएको अर्काे खेलमा एपीएफले पुलिसलाई ३-१ को सेटमा पराजित गरेको हो । एपीएफले २५-१७, २५-१५, २२-२५ र २५-२० सेटमा पुलिस क्लवलाई हराएको हो । एपीएफले ३ खेलबाट ९ अंक जोडेको छ ।

सोमबार नै भएको अर्को खेलमा सुदूरपश्चिम प्रदेशले सान्त्वना जीत पायो । सुदूरपश्चिमले कर्णाली प्रदेशलाई ३-१ को सेटमा हराएको हो । सुदूरपश्चिमले कर्णालीलाई २५-२१, २१-२५, २५-१८ र २५-२३ अंकले हराएको थियो ।

एक खेल जितेको कर्णालीले अन्तिम खेलमा गण्डकी प्रदेशको सामना गर्नेछ । समूह ‘बी’मा गण्डकी र त्रिभुवन आर्मी क्लबको समान ६ अंक छ । सुदूरपश्चिमको ४, कर्णालीको ३ र मधेशको १ अंक छ ।

त्यस्तै समूह ‘ए’ पहिलो खेलमा लुम्बिनीले कोशी प्रदेशलाई ३-१ ले हरायो। लुम्बिनीले कोशीलाई २५-१५, २१-२५, २५-१३ र २५-२१ अंकले पाखा लगाएको हो ।

समूह ‘ए’ मा पुलिस, एपीएफ, लुम्बिनी, बागमती र कोशी छन् । समूह ‘बी’ मा आर्मी, गण्डकी, कर्णाली, सुदूरपश्चिम र मधेश छन् । प्रतियोगितामा हरेक समूहका शीर्ष दुई टोलीले सेमिफाइनल खेल्नेछन् । नेपाल भलिबल संघको आयोजनामा उक्त प्रतियोगिता पुस २६ सम्म सुर्खेतमा चल्नेछ ।