पोखराका पत्रकार सञ्जय रानाभाट गाउँ पर्यटन पत्रकारिता पुरस्कार २०८० बाट पुरस्कृत भएका छन् । गाउँ पर्यटन प्रवर्द्धन मञ्च नेपाल (भिटोफ) गण्डकीले नवौं साधरणसभा तथा चौंथो अधिवेशनको अवसर पारेर बिहीबार रानाभाटलाई पुरस्कार प्रदान गरेको हो ।

गण्डकी प्रदेश सभा सदस्य प्रकाश बराल, भिटोफका केन्द्रीय अध्यक्ष गोपाल थापा र गण्डकी अध्यक्ष उदय सुवेदीले अर्मलाकोटमा आयोजित कार्यक्रममा रानाभाटलाई दोसल्ला ओढाएर सम्मानपत्र प्रदान गरे । प्रत्येक २ वर्षमा प्रदान गरिने उक्त पुरस्कारको राशि ११ हजार १११ रुपैयाँ छ । ग्रामीण पर्यटन प्रवर्द्धनमा योगदान पुर्‍याएबापत रानाभाटलाई पुरस्कार प्रदान गरेको भिटोफ अध्यक्ष सुवेदीले बताए ।

रानाभाट समाधान दैनिकका संवाददाता हुन् । २०७६ सालदेखि पत्रकारिता सुरु गरेका पत्रकार रानाभाटसँग पोखरेली न्यूज, गण्डकन्यूज, हिमाल खबर डटकम, रातोपाटी डटकममा पोखरा संवाददाता भएर काम गरेको अनुभव पनि छ । पोखरा १४ का बासिन्दा रानाभाट स्नातक तह चौथो वर्षमा अध्ययन गरिरहेका छन् ।

भिटोफ गण्डकी अध्यक्षमा शोमाकुमारी अधिकारी

गाउँ पर्यटन प्रवद्र्धन मञ्च नेपाल (भिटोफ) गण्डकीको अध्यक्षमा शोभाकुमारी अधिकारी चयन भएकी छन् । भिटोफ गण्डकीको नवौं साधारणसभा तथा चौंथो अधिवेशनबाट अधिकारीको नेतृत्वमा नयाँ कार्यसमिति चयन भएका हो ।

उपाध्यक्षमा प्रथम उपाध्यक्षमा रमेश अर्याल, द्वितीय उपाध्यक्षमा सुशीला भण्डारी चयन भएका हुन् । भिटोफको सचिवमा लक्ष्मण पहारी, कोषाध्यक्षमा शरण गुरुङ, सहसचिवमा विश्व क्षेत्री चयन भएका हुन् । सदस्यमा चिन्तामणि पोखरेल, भावना रानाभाट, विमल सापकोटा चयन भएका हुन् । निर्वाचन सम्पन्न संयोजक तारानाथ पहारी र सदस्य गोपाल थापा र रवीन्द्रराज पौडेल रहेको समिति बनेको थियो ।

भिटोफ केन्द्रीय अध्यक्ष गोपाल थापाले कसरी गाउँ पर्यटनलाई बढावा दिने भनेर कार्यपत्र प्रस्तुत गरेका थिए । कार्यक्रममा गण्डकी प्रदेश सांसद प्रकाश बराल दैनिक जीवन सरल बनाउन होमस्टेले सहयोग गरेको बताए । होमस्टेले परम्परागत भाषा संस्कृतिलाई अन्तर्राष्ट्रिय जगतमा पु¥याउने उनको भनाइ थियो ।

पोखरालाई पर्यटनको राजधानी घोषण गर्न हतार गर्न नहुने प्रदेश सांसद बरालले बताए । ‘पर्यटन राजधानी घोषण गर्ने कुरा गम्भीर भएर गर्नुपर्छ । हतार गर्नुहुँदैन । राजधानी हुँदैमा पर्यटन आउने होइन । हतार गरेर फुर्सदमा पछुयाउनु हुँदैन,’ उनले भने ।

भिटोफ गण्डकीका अध्यक्ष उदय सुवेदीले गाउँ प्रवद्र्धनले धेरै होमस्टेलाई प्रवद्र्धन गरेको बताए । उनले भिटोफ नपुगेको होमस्टे नै नभएको दाबी गरे । गाउँको पर्यटनलाई प्रवद्र्धन गर्ने उद्देश्य नै गाउँ पर्यटन प्रवद्र्धन मञ्चको रहेको उनले सुनाए । ‘यो संस्थाको लिगेसी होमस्टेसँग छ, सँगसँगै गाउँका अन्य पर्यटकीय गन्तव्यलाई पनि बढावा दिने उद्देश्य हो,’ उनले भने, ‘कोभिडको बेलामा सबैतिर ठप्प हुँदा पनि हामीले यसको प्रचार गर्न रोकेनौं । त्यसबेला कास्की पर्वत र बागलुङमा ३ जिल्लामा एकैचोटि प्रवद्र्धन गरिएको थियो ।

ढोरपाटन र ताङतिङलाई पनि भिटोफले नै प्रमोट गरेको हो ।’ भिटोफ गण्डकीका निर्वतमान अध्यक्ष उदय सुवेदी, पूर्वअध्यक्षद्वय नवराज अधिकारी र नवराज पहारी, सल्लाहकार टीकाराम सापकोटा, रामजी शर्मा, शोभाकुमारी अधिकारी, पोखरा वडा नम्बर २१ का पूर्वअध्यक्ष खगराज आचार्य, होमस्टेकी अध्यक्ष बबिता गुरुङ, पोखरा महानगरपालिका पर्यटन विकास समितिको उपाध्यक्ष रवीन्द्रराज पौडेल र पोखरा पर्यटन परिषद्का उपाध्यक्ष कृष्ण भण्डारीले अधिवेशनमा शुभकामना मन्तव्य दिएका थिए ।