पोखरा । गण्डकी ट्रक यातायात व्यवसायी संघले सार्वजनिक शौचालय सञ्चालनमा ल्याएको छ । शनिबार संघको ४३ औं स्थापना दिवस तथा वार्षिकोत्सवको उपलक्षमा पोखरा ९ नयाँबजार स्थित कार्यालय अवस्थित भवनको तल्लो तलामा सार्वजनिक शौचालय सञ्चालनमा ल्याएको हो ।

सार्वजनिक शौचालयको उद्घाटन गण्डकी प्रदेश सरकारका पूर्व कानुन मन्त्री तथा वर्तमान प्रदेश सभा सदस्य विन्दुकुमार थापाले गरेका हुन् । संस्थाका कोषाध्यक्ष तथा वार्षिकउत्सव सम्पन्न समितिका सदस्य एकेन्द्र कुँवरले संघले सामाजिक उत्तरदायित्व अन्तर्गत सार्वजनिक शौचालय सञ्चालन ल्याएको जानकारी दिए । शौचालय उद्घाटन गर्दै सांसद थापाले संघले उदाहरणीय सामाजिक कार्य गरेको सुनाए । ‘यो म बस्ने टोल विकास संस्था पनि हो । यहाँ अत्याधिक चापहुँदा सार्वजनिक शौचालय नभएकै कारणले धेरै समस्या भएको थियो । आवश्यकतालाई मध्यनजर गर्दै संघले आफ्नो सामाजिक उत्तरदायित्व अन्तर्गत सार्वजनिक शौचालय सञ्चालनमा ल्याएर सहयोग गरिदिनुभएकोमा आभारी छु,’ थापाले भने । थापाले आगामी दिनमा पनि सामाजिक कार्यमा जोडिन आग्रह गरेका छन् । उनले शौचालयले सामाजिक अवरोध केही हदसम्म हट्ने विश्वास व्यक्त गरे ।

यस्तै, संघले आफ्नो स्थापना दिवस तथा वार्षिकोत्सव उत्सवको अवसरमा अन्य थप तीन वटा कार्यक्रम गरेको छ । पोखरा ३२ लामेआहालको राधाकृष्ण वृद्ध आश्रममा ४० हजार बराबरको खाद्यान्न वितरण गरेको संघका सूचना अधिकारी चोमराज थापाले जानकारी दिए ।

संघले शनिबार बिहानै कार्यालयको भवन नजिकै खुला रक्तदान कार्यक्रम गरेको हो । सूचना अधिकारी थापाले २५ युनिट रगत संकलन भएको जानकारी दिए । रक्तदान कार्यक्रममा मनोजजंग रानाले पहिलो रक्तदान गरेका हुन् । उनको यो ११ पटकको रक्तदान भएको सुनाए ।

कार्यक्रममा प्रमुख अतिथि प्रदेश सभा सदस्य थापाले रक्तदानबाट कसैको जीवनदान हुने भएकाले यस्तो कार्य पुन्य भएको बताए । ‘यस्तो पुन्यको कार्यक्रममा जोडिनुभएको छ । यहाँहरु सम्पूर्णलाई हार्दिक धन्यवाद । आगामी दिनमा यस्ता कार्यक्रममा जोडिँदै जानुहोला मेरो शुभेक्षा छ,’ थापाले भने ।

थापाले देशमा बढ्दो आर्थिक संकटका बेला संघले गर्दै आएको सामाजिक उत्तरदायित्व सबैका लागि मार्गनिर्देशन हुने सुनाए । कार्यक्रममा संघका अध्यक्ष सुरेन्द्र त्रिपाठीले व्यवसायी हकहितका अलावा सामाजिक क्षेत्रमा योगदान गर्नु जरुरी भएको बताए । संघले सामाजिक क्षेत्रमा गर्ने कार्यलाई निरन्तरता दिने उनको प्रतिबद्धता छ । कार्यक्रममा संघका वरिष्ठ उपाध्यक्ष कल्याण तिमिल्सिनाले स्वागत मन्तव्य राखेका थिए । भने महासचिव रुद्रबहादुर कार्कीले कार्यक्रम सञ्चालन गरेका थिए । कार्यक्रममा पोखरा महानगरपालिका वडा नम्बर ९ का वडाअध्यक्ष दीपेन्द्र मर्सानी, संस्थापक अध्यक्ष तेजनाराण तिमिल्सिना, निर्वतमान अध्यक्ष रवीन्द्र गिरी, भूपू अध्यक्ष रुद्रप्रसाद तिमिल्सिना र टिका भुलेज लगायत विभिन्न व्यवसायीहरुको उपस्थिति थियो । संघले शनिबार बेलुका कार्यालय परिषद्मा दीप प्रज्वलन गरेको छ ।