पोखरा । पोखरामा करिब दुई साता देखि बन्द भएको प्याराग्लाइडिङ पुनः सुचारु हुने भएको छ ।

नेपाल नागरिक उड्डयन प्राधिकरण(क्यान) र व्यवसायी बिच बिहीबार भएको छलफलबाट विवाद समाधान भएको र पुनः प्याराग्लाइडिङ सुचारु हुने सहमति भएको प्राधिकरणले जनाएको छ ।

नेपाल हवाई खेलकुद संस्था (ना) पोखराका अध्यक्ष सुनिल भट्टराईका अनुसार सुरुवातमा जुन मूल्य तोकेर सेवा सञ्चालन गरेका थिए, त्यही अनुसार गर्ने भनेर व्यावसायीबीच सहमति भएको छ ।

प्राधिकरणले अब आधिकारिक पत्र पठाएर प्याराग्लाइडिङ खोल्न भनेसँगै सेवा सुचारु गर्ने उनले बताए । प्राधिकरणले संभवतः आज शुक्रबार पत्र पठाउने छ ।

गत मंसिर अन्तिम साता प्याराग्लाइडिङका कम्पनीहरूले आफैँ उडाउन पाउने त्यसको मूल्य पनि आफ्नै हिसाबले लिन पाउनुपर्ने माग गर्दै आएका थिए त्यसको विवाद नाले मिलाउन नसके पछि क्यानले तत्काललाई पोखराको प्याराग्लाइडिङ स्थगित गर्न सूचना जारी गरेको थियो ।