पोखरा महानगरपालिका वडा नं. १४, चाउथे अनुपमटोलमा अवस्थित पोखरा पब्लिक स्कुलको २९ औं वार्षिकोत्सव विविध सांस्कृतिक समारोहसहित सम्पन्न भएको छ ।

स्कुलले दूई दिने कार्यक्रमको आयोजना गरेर वार्षिकोत्सव मनाएको हो । पहिलो दिन विद्यार्थीहरुको कला प्रदर्शनी गरिएको थियो ।

वार्षिकोत्सवको बुधबार विशेष कार्यक्रममा बोल्दै पोखरा महानगरपालिका वडा नं. १४ का अध्यक्ष बोधबहादुर कार्कीले देशको शिक्षा क्षेत्रको विकासको लागि निजी विद्यालय र सामुदायिक विद्यालय मिलेर अगाडि बढ्नुपर्ने बताए । उनले पोखरा पब्लिक स्कुलले शैक्षिक क्षेत्रमा पु¥याएको योगदानको प्रशंसा गरे ।

विद्यालय व्यवस्थापन समितिका अध्यक्ष बसन्तप्रसाद पराजुलीको अध्यक्षतामा भएको कार्यक्रममा सल्लाहकार समिति संयोजक हेरम्बराज कोइराला, पोखरा महानगरपालिका शिक्षा महाशाखाका अधिकृत बद्रीनाथ सुवेदी, विद्यालयका संस्थापक प्रिन्सिपल कृष्ण के.सी.लगायतले बोलेका थिए ।

वार्षिकउत्सव तथा अभिभावक दिवस अन्तरगत बुधबार २०७९ सालको एसईई परीक्षामा विद्यालयबाट सर्वोत्कृष्ट अंक ल्याएका राम शरण थापालाई नगद पच्चिस हजार रुपैयाँ र चाँदीको पदकले सम्मान गरिएको विद्यालयका नेपाली शिक्षक बुद्धिसागर त्रिपाठीले जानकारी दिए ।

द्वितिय भएका संस्कार सापकोटा, सुजिन गुरुङ तथा तृतिय भएका प्रकरण सारु र प्रदीप थापालाई चाँदीको पदकले सम्मान गरिएको थियो ।

कक्षा १२ एस.एल.सी परिक्षामा सहभागी बनेर विद्यालयको तर्फबाट उत्कृष्ट अङ्क ल्याउने विद्यार्थीहरू पोसा कँडेल, अमृता पोखरेल र सलिना थापालाई समेत चाँदीको पदकले सम्मान गरियो ।

विद्यालयको परिक्षामा सर्वोत्कृष्ट हुने मध्येमा जुनियर लेभलमा छात्रतर्फ आगमन बराल र छात्रा तर्फ शान्सा न्यौपाने तथा सिनियर लेभलमा छात्र तर्फ सिमान्त पोखरेल र छात्रा तर्फ ऋतु खड्कालाई समेत पुरस्कृत गरिएको शिक्षक त्रिपाठीले बताए ।

वार्षिकोत्सव तथा अभिभावक दिवस कार्यक्रमको थप आर्कषणको रुपमा लोकनृत्य, प्रत्यक्ष गायन, सांस्कृतिक भेषभूषा लगायत समेत रहेको थियो ।

पहिलो दिन बृहत शैक्षिक प्रदर्शनी [भिडियो]

पहिलो दिन मंगलबार बृहत शैक्षिक प्रदर्शनी आयोजना गरिएको छ । प्रदर्शनीमा विद्यार्थीले निर्माण गरेका सामाग्रीहरू राखिएको थियो ।

प्रर्दशनीको पृथ्वीनारायण बहुमुखी क्याम्पसका पूर्व क्याम्पस प्रमुख एवं पोखरा पब्लिकका संस्थापक विश्वराज अधिकारीले उद्घाटन गरें । प्रदर्शनीमा राखिएका शैक्षिक सामाग्रीको अवलोकन गरी जानकारी लिएका उनले विद्यार्थीले गरेको मेहनतको तारिफ गरे ।

विद्यालय व्यवस्थापन समितिका अध्यक्ष बसन्तप्रसाद पराजुलीको अध्यक्षतामा भएको कार्यक्रमको सञ्चालन नेपाली विषयका शिक्षक बुद्धिसागर त्रिपाठीले गरेका थिए ।

२९ वर्ष अगाडि स्थापना भएको यो विद्यालयमा नर्सरी देखि १२ कक्षा सम्मको पढाई हुन्छ । कुल १ हजार १ सय ३२ जना विद्यार्थीले अध्ययन गर्ने विद्यालयमा ५५ जना शिक्षक र २५ जना कर्मचारी गरेर कुल ८० जनाले प्रत्यक्ष रोजगारी समेत पाएका छन् ।