नक्कली खाता बनाएर फेसबुक मार्फत् ब्ल्याकमेल गर्ने तीन युवकलाई चितवन प्रहरीले पक्राउ गरेको छ । पक्राउ परेका मध्ये एक जना पोखराका रहेका छन् ।

उनीहरु चितवनको कृषि तथा बन विज्ञान विश्वविद्यालयमा अध्ययनरत विद्यार्थी रहेको प्रहरीले पुष्टि गरेको छ । माओवादी निकटको विद्यार्थी संगठन अखिल क्रान्तिकारीको विभिन्न कमिटिमा रहेका उनीहरुले अश्लिल भिडियो बनाएर सार्वजनिक गरिदिन्छु भनेर धम्काउने र रकम माग्ने गरेका थिए ।

पक्राउ पर्नेमा पोखरा महानगरपालिका २९ का २२ वर्षीय अनुराग घिमिरे, चितवनको रत्ननगर नगरपालिका १३ घर भएका २० वर्षका प्रवेश रिमाल र सिराहाको लाहान नगरपालिका १ घर भएका १९ वर्षका युनिक सिंह रहेका छन् ।

पक्राउ पर्ने युनिक सिंह र प्रवेश सिंह अखिल क्रान्तिकारी विश्वविद्यालय कमिटिको कार्यसमिति सदस्य हुन् । यस्तै, पक्राउ परेका अनुराग घिमिरे माओवादी निकटका विद्यार्थीले चलाएको ग्रुप अफ एग्रीकल्चर एण्ड भेटेरिनरी विद्यार्थी (जीएभिएस) का सदस्य छन् ।

उनीहरुले फेसबुकमा महिलाको फेक आइडी बनाई महिलाकै आवाज निकालेर च्याट गर्ने, अश्लील भिडियो पठाउने गर्दै चितवनका दुई पुरुष र कास्कीका एक महिलासँग फिरौती रकम मागेको जिल्ला प्रहरी कार्यालय चितवनका प्रवक्ता डिएसपी विजयराज पण्डितले सञ्चारकर्मीलाई जानकारी दिएका छन् ।

उनका अनुसार उनीहरुको भिडियो कल रेकर्ड र फिरौती रकम मागेको प्रकृति हेर्दा समूहमा अरु पनि सहभागी हुनसक्ने आशंका रहेको छ । उनीहरुले कसैसँग दुई, कसैसँग चार लाख रुपियाँ रकम मागेका थिए ।

उक्त रकम नदिए भिडियो सार्वजनिक गर्ने धम्की दिएका फोन रेकर्ड रहेको डिएसपी पण्डितले जानकारी दिए । उनीहरु तीनै जनालाई कृषि तथा वन विज्ञान विश्वविद्यालय परिसरबाट प्रहरीले पक्राउ गरेको थियो । उनीहरुको साथबाट फिरौती लिएको ७६ हजार रुपियाँ र ४ थान मोबाइल सेट पनि बरामद गरिएको डिएसपी पण्डितले जानकारी दिएको चितवन आजले समाचार प्रकाशन गरेको छ ।